پاکستان پیپلز پارٹی کے چیئرمین بلاول بھٹو زرداری نے پنجاب کے رہنماؤں کو آپس کے اختلافات ختم کرنے کی ہدایت کرتے ہوئے کہا ہے کہ پنجاب کی قیادت کے لئے سینئر رہنما ندیم افضل چن کا نام سر فہرست ہے۔

بلاول بھٹو نے کہا کہ پنجاب کے رہنما اختلافات ختم کرکے پارٹی اور عوامی مسائل پر توجہ دیں۔ آپس کے اختلاف کے باعث پنجاب میں پارٹی متاثر ہو رہی ہے۔

انھوں نے کہا کہ رہنما ایک دوسرے کے ساتھ قدم بہ قدم ملا کر چلیں۔ جو شخص پارٹی اور عوام کے لئے کام کرے گا اسے آگے لایا جائے گا۔

بلاول نے کہا کہ راجہ پرویز اشرف 100 روز میں پارٹی کی قیادت کو سفارشات پیش کریں گے۔

واضح رہے کہ چیئرمین پیپلزپارٹی نے ندیم افضل کو نئی ذمے داری دینے کا اعلان نہیں کیا بلکہ بلاول نے مستقبل کے حوالے سے عندیہ دیا کہ پنجاب کی قیادت کے لئے پیپلز پارٹی کے سینئر رہنما ندیم افضل چن کا نام سر فہرست ہے۔