پاکستان تحریک انصاف کی کور کمیٹی کا اجلاس اسلام آباد میں ہوا جس میں وفاقی دارالحکومت کا جلسہ ہر صورتب 22 اگست کو کرنے کا فیصلہ کیا گیا۔ کور کمیٹی نے حماد اظہر کا استعفیٰ بھی مسترد کردیا۔

کور کمیٹی نے حماد اظہر سے درخواست کی کہ وہ اپنی ذمہ داریوں کو جاری رکھیں اور موجودہ مشکل وقت میں پارٹی کو مزید مضبوط بنانے میں اپنا کردار ادا کریں۔

واضح رہے کہ جمعرات کو پاکستان تحریک انصاف (پی ٹی آئی) پنجاب کے صدر حماد اظہر نے اپنے عہدے سے مستعفی ہونے کا اعلان کیا تھا۔

حماد اظہر نے ”ایکس“ پر لکھا تھا کہ بدقسمتی سے میری بانی پی ٹی آئی تک رسائی نہیں ہے، میں نے پریس کانفرنس نہیں کی اور نہ ہی کوئی ڈیل کی۔

انہوں نے لکھا تھا کہ میری نقل و حرکت پر بہت سختی ہے، اڈیالہ نہیں جاسکتا، پنجاب کی تنظیم میں ایسے فیصلے ہوئے جن پر نہ میری رائے، نہ رضامندی شامل تھی۔

انہوں نے کہا تھا کہ ان میں اکثر فیصلے ایسے بھی تھے جن پر میرٹ کی بجائے لابنگ تھی۔ ‏لابنگ ہورہی تھی کہ لاہور کے صدر چوہدری اصغر کو بدلا جائے، خان صاحب کو غلط حقائق دے کر ہدایت حاصل کرلی۔

حماد اظہر نے کہا تھا کہ چوہدری اصغر کا قصور یہ ہے کے وہ دو ماہ قید میں رہے، میں پنجاب کی صدارت کا چارج چھوڑ رہا ہوں، بانی پی ٹی آئی کا ایک کارکن تھا اوررہوں گا۔