اسٹار بکس کے سی ای او ہر ہفتے تین بار ہزار میل کا فضائی سفر کریں گے
اسٹار بکس کے سی ای او براین نکول نے اعلان کیا ہے کہ وہ اپنی رہائش تبدیل نہیں کریں گے بلکہ اسٹار بکس کے ہیڈ کوارٹرز جانے کے لیے ہفتے میں تین بار ایک ہزار میل کا فضائی سفر کریں گے۔
براین نکول کے اس اعلان پر سوشل میڈیا یوزرز نے شدید نکتہ چینی کرتے ہوئے کہا ہے کہ کیا اب ماحول کو نقصان نہیں پہنچے گا۔
یاد رہے کہ ماحول کو پہنچنے والے نقصان میں کمی کے لیے اسٹار بکس نے 6 سال قبل پلاسٹک کی اسٹرا کا استعمال ترک کردیا تھا۔
براین نکول کیلیفورنیا میں رہتے ہیں۔ انہوں نے سئیٹل میں رہائش اختیار کرنے سے معذرت کرلی ہے۔ وہ ہر ہفتے تین دن نیو پورٹ بیچ سے سئیٹل جایا کریں گے۔ اس کے لیے وہ ایک پرائیویٹ کارپوریٹ جیٹ استعمال کریں گے۔
سوشل میڈیا کے بہت سے یوزرز نے کہا ہے کہ یہ صریح منافقت ہے کہ ہمیں پلاسٹک کی جگہ کاغذ کی اسٹرا استعمال کرنے کی تلقین کی جارہی ہے کہ ایسا کرنے سے ماحول کو پہنچنے والے نقصان میں کمی آئے گی اور خود ہر ہفتے تین بار ہزار میل کا فضائی سفر کرنے کا ارادہ ہے۔ کیا اس سے ماحول کو نقصان نہیں پہنچے گا۔