جنوبی ویلز کی ماہر اسکائی ڈائیور نے مبینہ طور پر 10 ہزار فٹ کی بلندی سے چھلانگ لگا کر اپنی زندگی کا خاتمہ کر لیا۔

غیر ملکی میڈیا رپورٹس کے مطابق ایک 32 سالہ تجربہ کار اسکائی ڈائیور جیڈ داماریل نے مبینہ طور پر 10 ہزار فٹ کی بلندی سے چھلانگ لگا کر خودکشی کرلی، یہ واقعہ بوائے فرینڈ سے علیحدگی کے ایک روز بعد پیش آیا۔

ڈیلی میل کی رپورٹ کے مطابق جیڈ نے جان بوجھ کر پیراشوٹ نہ کھولنے کا فیصلہ کیا اور 120 میل فی گھنٹہ کی رفتار سے زمین پر آگری۔

رپورٹ کے مطابق خاتون اسکائی ڈائیور کا تعلق جنوبی ویلز سے تھا اور وہ اسکائی ڈائیونگ میں خاصہ تجربہ رکھتی تھیں، جنہوں نے 400 سے زائد اونچائی سے چھلانگ لگائی تھی۔ ویلز پولیس نے فوری طور پر حادثے یا کسی مجرمانہ پہلو کو مسترد کر دیا۔

رپورٹ میں کہا گیا کہ جیڈ نے خودکشی سے ایک رات قبل اپنے 26 سالہ اسکائی ڈائیور بوائے فرینڈ بین گوڈفیلو سے علیحدگی اختیار کی تھی۔ دونوں گزشتہ چھ ماہ سے زائد عرصے سے ساتھ تھے۔

ایک قریبی دوست نے ڈیلی میل کو بتایا وہ دونوں ایک دوسرے سے الگ ہی نہیں ہوتے تھے۔ سارا وقت اکٹھے گزارتے تھے، کسی اور سے زیادہ بات چیت نہیں کرتے تھے۔ وہ ہمیشہ ایک ساتھ اسکائی ڈائیونگ کرنے جاتے تھے۔ جیڈ کی موت سے ایک رات قبل بین نے رشتہ ختم کر دیا۔ اگلے روز جب بین کام پر گیا تو اسی دوران جیڈ نے اپنی زندگی ختم کر لی۔

ابتدائی طور پر اس واقعے کو ایک افسوسناک حادثہ سمجھا گیا، لیکن بعد ازاں SkyHigh Skydiving نے ایک بیان جاری کیا جس میں کہا گیا کہ یہ ممکنہ طور پر ارادی اقدام تھا۔ تحقیق میں پیراشوٹ یا ساز و سامان میں کسی خرابی کا کوئی ثبوت نہیں ملا۔

جیڈ کے قریبی دوستوں کے مطابق پولیس کو ایک خودکشی کا نوٹ بھی ملا ہے جس میں ان کے حالیہ بریک اپ کا حوالہ موجود تھا۔ خیال ظاہر کیا جا رہا ہے کہ جیڈ نے دانستہ طور پر اسکائی ڈائیو کے دوران اپنا پیراشوٹ نہ کھولنے کا فیصلہ کیا، جس کے نتیجے میں وہ زمین پر گر کر ہلاک ہو گئیں۔