کراچی کی نیپا چورنگی پر پیش آنے والے دلخراش واقعے نے پورے شہر کو ہلا کر رکھ دیا۔ ایک معصوم بچہ برساتی نالے میں گر کر لاپتا ہوا، اور اسی واقعے پر میئر کراچی مرتضیٰ وہاب نے افسوس اور تشویش کا اظہار کرتے ہوئے کہا ہے کہ وہ خود اس کی سی سی ٹی وی فوٹیج نکلوا رہے ہیں۔

میئر کراچی نے کہا کہ افسوس سے کہنا پڑتا ہے کہ شہر میں ہر واقعے پر سیاست کی جاتی ہے۔ ان کا کہنا تھا کہ وہ مکمل طور پر انتظامیہ سے رابطے میں ہیں اور بچہ تلاش کرنے کا عمل مسلسل جاری ہے۔ انہوں نے بچے کے والدین سے ہمدردی کا اظہار کرتے ہوئے کہا کہ وہ اس واقعے پر دل سے غمگین ہیں۔

مرتضیٰ وہاب نے اعلان کیا کہ اس افسوسناک حادثے کی مکمل تحقیقات ہوں گی اور جہاں بھی کوتاہی نظر آئی، ذمہ داروں کے خلاف سخت کارروائی کی جائے گی۔ انہوں نے ایم ڈی واٹر بورڈ کو واقعے کی فوری تحقیقات کا حکم بھی دے دیا ہے۔

میئر کراچی نے بتایا کہ عوام کو مشتعل کرنے والی گفتگو اور الزام تراشی مسائل حل کرنے میں رکاوٹ بنتی ہے۔ اس کے باوجود ریسکیو کا عمل تیزی سے جاری ہے اور متعلقہ جگہ کے 500 میٹر حصے میں کھدائی بھی کی جاچکی ہے۔