آئی سی سی مینز ٹی 20 ورلڈ کپ کے بارہویں میچ میں پاکستان نے امریکا کو 32 رنز سے شکست دے کر میگا ایونٹ میں مسلسل دوسری کامیابی حاصل کرلی اور پوائنٹس ٹیبل پر قبضہ جمالیا۔

کولمبو میں کھیلے گئے ٹی 20 ورلڈ کپ میں گروپ اے کے میچ میں امریکا کی دعوت پر پاکستان ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 190 رنز بنائے جب کہ 191 رنز کے ہدف کے تعاقب میں امریکی ٹیم مقررہ 20 اوورز میں 8 وکٹوں کے نقصان پر 158 رنز ہی بناسکی۔

پاکستان کی بیٹنگ

امریکا کی ٹیم نے ٹاس جیت کر پاکستان کو بیٹنگ کی دعوت دی، قومی ٹیم کی جانب سے صائم ایوب اور صاحبزادہ فرحان نے اننگز کا آغاز کیا اور دونوں بلے بازوں نے جارحانہ بیٹنگ کرتے ہوئے قومی ٹیم کو 54 رنز کا آغاز فراہم کیا تاہم صائم ایوب 19 رنز بنانے کے بعد کیچ آؤٹ ہوگئے۔

اس کے بعد آنے والے بلے باز سلمان علی آغا بھی زیادہ دیر وکٹ پر نہ ٹھہر سکے اور 56 کے اسکور پر سلمان علی آغا بھی ایک رن بنانے کے بعد اپنی وکٹ گنوا بیٹھے۔

سلمان علی آغا کے آؤٹ ہونے کے بعد بابر اعظم کریز پر آئے اور انہوں نے صاحبزادہ فرحان کے ساتھ مل کر ٹیم کی کمان سنبھالی، صاحبزادہ فرحان اور بابر اعظم نے دلکش شاٹس لگائے اور فرحان نے نصف سنچری مکمل کی۔ دونوں بلے بازوں کے درمیان تیسری وکٹ پر 81 رنز کی شراکت قائم ہوئی تاہم ٹیم کا اسکور 137 تک پہنچا تو بابر اعظم 32 گیندوں پر 46 رنز بناکر کیچ آؤٹ ہوگئے، ان کی اننگز میں چار چوکے اور ایک چھکا شامل تھا۔

بابر اعظم کے آؤٹ ہوتے ہی اگلے اوور میں پاکستان کو 143 کے اسکور پر چوتھا نقصان بھی اٹھانا پڑا، صاحبزادہ فرحان 73 رنز بناکر آؤٹ ہوئے، ان کی اننگز میں پانچ چھکے اور چھ چوکے شامل تھے۔

اسی کے ساتھ صاحبزادہ فرحان نے بین الاقوامی ٹی 20 کیریئر میں  1000 رنزمکمل کرنے کا سنگِ میل بھی عبور کیا۔

اختتامی اوورز میں شاداب خان نے اپنی برق رفتار اننگز کی بدولت محمد نواز کے ساتھ مل کر پانچویں وکٹ پر 34 رنز کی شراکت قائم کی اور پاکستان کا اسکور 177 تک پہنچایا تاہم شاداب چار چوکوں اور ایک چھکے کی مدد سے 12 گیندوں پر 30 رنز بنانے کے بعد آؤٹ ہوگئے۔

اس کے بعد پاکستان کی یکے بعد 179 کے اسکور پر پی پاکستان کی یکے بعد دیگر دو وکٹیں گرگئیں، فہیم اشرف ایک اور محمد نواز 5 رنز بناکر پویلین لوٹ گئے۔ جب کہ 182 کے اسکور پر عثمان خان اور 190 رنز پر ابرار احمد بغیر کوئی رن بنائے رن آؤٹ ہوگئے۔ شاہین شاہ آفریدی 9 رنز بناکر ناٹ آؤٹ رہے۔

امریکا کی جانب سے شیڈلے وین اسکالکوک نے 4 کھلاڑیوں کو آؤٹ کیا جب کہ محمد محسن، سوربھ نیٹراولاکر اور ہرمیت سنگھ نے ایک، ایک وکٹ حاصل کی۔

اس طرح پاکستان نے مقررہ 20 اوورز میں 9 وکٹوں کے نقصان پر 190 رنز بنائے اور امریکا کو جیت کے لیے 191 رنز کا ہدف دیا۔

امریکا کی بیٹنگ

پاکستان کے 191 رنز کے ہدف کے تعاقب میں امریکا کا آغاز اچھا ہوا، امریکی اوپنرز کے درمیان 42 رنز کی شراکت داری قائم ہوئی لیکن پھر اندریس گوس 13 رنز بناکر آؤٹ ہوگئے۔

امریکا کو دوسرا نقصان موناک پٹیل کی صورت میں اٹھانا پڑا وہ 3 رنز پر پویلین لوٹے، اس کےعلاوہ شیان جہانگیر 49 اور شبھم رانجانے 51 رنز بناکر نمایاں بیٹررہے جب کہ ملند کمار نے 29 رنز کی اننگز کھیلی۔

اس کے علاوہ ہرمیت سنگھ 6، کپتان مونانک پٹیل 3 جب کہ محمد محسن اور سنجے کرشنامورتی صفر کے انفرادی اسکور پر آؤٹ ہوئے۔

پاکستان کی جانب سے عثمان طارق نے 3 ، شاداب خان نے 2 جب کہ محمد نواز ، ابرار احمد اور شاہین شاہ آفریدی نے ایک، ایک وکٹ حاصل کی۔

اس طرح امریکا کی ٹیم 191 رنز کے جواب میں مقررہ 20 اوورز میں 8 وکٹوں کے نقصان پر 158 رنز بناسکی اور پاکستان نے یہ میچ 32 رنز سے اپنے نام کرلیا۔ پاکستان کی میگا ایونٹ میں یہ مسلسل دوسری جیت ہے۔

اس جیت کے بعد پاکستان گروپ اے کے پوائنٹس ٹیبل پر پہلی پوزیشن پر پہنچ گیا۔ یاد رہے کہ قومی ٹیم نے اپنے پہلے میچ میں سنسنی خیز مقابلے کے بعد نیدرلینڈز کو 3 وکٹوں سے شکست دی تھی۔

پاکستانی بلے باز صاحبزادہ فرحان کو امریکا کے خلاف 73 رنز کی شاندار اننگز کھیلنے پر میچ کا بہترین کھلاڑی قرار دیا گیا۔ انہوں نے کہا کہ کوشش ہوگی بھارت کے خلاف بھی اسی طرح اچھا پرفارم کریں۔

میچ کا ٹاس

سری لنکا کے شہر کولمبو میں کھیلے گئے ٹی 20 ورلڈ کپ کے میچ میں امریکا کے کپتان مونانک پٹیل نے ٹاس جیت کر پاکستان کو پہلے بیٹنگ کی دعوت دی ہے۔

پاکستان نے آج کے میچ کے لیے پلیئنگ الیون میں ایک تبدیلی کرتے ہوئے سلمان مرزا کی جگہ اسپنر عثمان طارق کو شامل کیا ہے جب کہ امریکا کی ٹیم میں علی خان کی جگہ پاکستان کے سابق فاسٹ بولر احسان عادل کو شامل کیا گیا ہے۔

ٹاس کے بعد گفتگو کرتے ہوئے قومی کرکٹ ٹیم کے کپتان سلمان علی آغا نے کہا کہ ایک تبدیل کرتے ہوئے کوشش ہوگی امریکا کے خلاف بڑا اسکور کریں، کافی عرصے سے ہماری ٹیم اچھی کرکٹ کھیل رہی ہے۔

امریکی ٹیم کے کپتان نے کہا کہ ہم اچھی بولنگ کرکے پاکستان کو کم اسکور پر روکنے کی کوشش کریں گے، ہم نے گزشتہ میچ میں بھارت کے خلاف اچھی کرکٹ کھیلی۔

پاکستان کا اسکواڈ

سلمان علی آغا کی قیادت میں پاکستان ٹیم میں شامل کھلاڑیوں میں صاحبزادہ فرحان، صائم ایوب، بابر اعظم، عثمان خان، شاداب خان، محمد نواز، فہیم اشرف، شاہین آفریدی، عثمان طارق اور ابرار احمد شامل ہیں۔

امریکا کا اسکواڈ

امریکی ٹیم میں کپتان موناک پٹیل، ایندریس گوس، شایان جہانگیر، ملند کمار، سنجے کرشناموتھی، شبھم رانجانے، ہرمیت سنگھ، محمد محسن، شیڈلے وین شواک ویک، احسان عادل اور سوربھ نیٹراولاکر شامل ہیں۔

واضح رہے پاکستان نے اپنے پہلے میچ میں نیدرلینڈز کے خلاف سنسنی خیز مقابلے کے بعد 3 وکٹوں سے کامیابی حاصل کی تھی جب کہ امریکا کو بھارت کے خلاف اپنے پہلے میچ میں 29 رنز سے شکست کا سامنا کرنا پڑا تھا۔

پاکستانی ٹیم دوسرا میچ جیت کر گروپ میں پہلے نمبر پر آجائے گی جب کہ امریکا کے لیے اب یہ میچ ڈو اور ڈائی ہوگا۔