ویلنٹائن ڈے خوشیوں، محبت کے اظہار اور قریبی لوگوں کو تحائف دینے کا موقع ہوتا ہے۔ کپلز کے لیے خصوصی تحائف، رومانوی میسجز،یا آن لائن خریداری کے ذریعے محبت کا اظہار کرنا سب کچھ عام ہے۔ لیکن اسی خوشیوں کے موقع کا فائدہ فراڈی لوگ بھی اٹھاتے ہیں، جو آن لائن دھوکہ دہی کے ذریعے آپ کے پیسے اور ذاتی معلومات چرانے کی کوشش کرتے ہیں۔

چھوٹے تحائف کی پرکشش آفرز، رومانوی پیغامات میں موجود لنکس، یا ڈسکاؤنٹ کے بہانے بھی آپ کے بینک اکاؤنٹ یا پرسنل ڈیٹا کے لیے خطرہ بن سکتے ہیں۔

اکثر لوگ ان فراڈز کا شکار اس لیے ہو جاتے ہیں کیونکہ یہ بہت حقیقی اور معمولی لگتے ہیں، لیکن ایک لمحے کی بد احتیاطی آپ کو نقصان میں ڈال سکتی ہے۔

آج ہم آپ کو بتائیں گے کہ ویلنٹائن ڈے کے موقع پر عام آن لائن فراڈ کون سے ہیں، ان کی پہچان کیسے کریں اور اپنے آپ کو کیسے ان سے محفوظ رکھیں؟

چاہے آپ آن لائن شاپنگ کر رہے ہوں، کسی کو گفٹ بھیج رہے ہوں یا رومانوی میسج کے ذریعے پیار کا اظہار کر رہے ہوں، یہ تجاویز آپ کے لیے مددگار ثابت ہوں گی۔

جعلی تحائف اور ڈسکاونٹ آفر

آن لائن فراڈی ویب سائٹس پر سستے تحائف یا خصوصی آفرز جیسے پھول، چاکلیٹ یا گجٹ، دکھا کر اپ سے ادائیگی لوٹ لی جاتی ہے۔ لیکن اصل میں یہ مصنوعات یا خدمات فراہم نہیں ہوتیں۔ ہمیشہ ویب سائٹ کے ریویوز چیک کریں اور مشکوک لنکس کے ذریعے ادائیگی نہ کریں۔

رومانس کے بہانے فراڈ

آن لائن ڈیٹنگ ایپس یا سوشل میڈیا پر کوئی شخص محبت کے بہانے آپ سے پیسے یا بینک کی تفصیلات مانگ سکتا ہے۔ اگر کوئی نیا آن لائن دوست آپ سے فوری مالی مدد یا تحفے مانگتا ہے تو محتاط رہیں۔ جذباتی دباؤ ڈال کر پیسے حاصل کرنا عام طریقہ ہے۔

فشنگ ای میلز اور مشکوک لنکس

’اسپیشل فور ویلنٹائن ڈیلز‘ کے نام پر موصول ہونے والے میسجز اکثر نقصان دہ لنکس ہوتے ہیں جو آپ کے بینک اور ذاتی ڈیٹا تک رسائی حاصل کرنے کی کوشش کرتے ہیں۔ ایسے لنکس پر کلک کرنے سے آپ کا بینک اکاؤنٹ یا پرسنل ڈیٹا ہیک ہو سکتا ہے۔

جعلی ڈلیوری نوٹیفیکیشنز

اسکیم کرنے والے کبھی کبھار ڈلیوری کے نوٹیفیکیشن بھیجتے ہیں اور چھوٹے پیمنٹ یا تصدیق کے لیے لنک پر کلک کرنے کا کہتے ہیں۔ ہمیشہ اصل آرڈر کے اصلی ہونے کی تصدیق کریں۔

سوشل میڈیا اسٹور فراڈ

کچھ سوشل میڈیا صفحات مہنگے تحائف سستے داموں دکھاتے ہیں۔ اگر کسی اسٹور کے پاس رابطے یا ریٹرن پالیسی نہ ہو، تو خریداری کرنے سے گریز کریں۔

ای کارڈز میں مالویئر

انجان ویلنٹائن ای کارڈز کے ساتھ نقصان دہ فائلز آ سکتی ہیں۔ اگر بھیجنے والے کو نہیں جانتے تو کچھ بھی ڈاؤن لوڈ نہ کریں۔

ادائیگی کے دھوکہ دہی کے طریقے

فراڈ کرنے والے کیو آر کوڈز یا براہِ راست ٹرانسفر کے ذریعے ادائیگی طلب کر سکتے ہیں۔ ہمیشہ محفوظ اور معروف پیمنٹ پلیٹ فارم استعمال کریں۔

ہمیشہ معتبر ویب سائٹس اور ادائیگی کے طریقے استعمال کریں، مشکوک لنکس پر کلک نہ کریں اور ذاتی یا بینک معلومات جلدی میں شیئر نہ کریں۔ اگر کچھ غیر معمولی لگے تو فوراً روکیں اور تصدیق کریں۔

ویلنٹائن ڈے کے موقع پر محبت کا اظہار ضرور کریں، لیکن آن لائن فراڈ سے بچاؤ کے لیے محتاط رہنا بھی اتنا ہی ضروری ہے۔ تھوڑی سی احتیاط آپ کے پیسوں اور ذاتی معلومات کو محفوظ رکھ سکتی ہے۔