جنوبی امریکا کے ملک کولمبیا میں 7.4 شدت کے طاقتور زلزلے نے بڑے پیمانے پر تباہی مچا دی، جس کے نتیجے میں کم از کم 47 افراد ہلاک ہوگئے ہیں جب کہ متعدد عمارتیں منہدم ہونے سے لوگوں کے ملبے تلے دبے ہونے کا خدشہ ہے۔ زلزلے کے جھٹکے دارالحکومت بوگوٹا سمیت ملک کے مختلف علاقوں اور پڑوسی ممالک میں بھی محسوس کیے گئے۔

امریکی خبر رساں ادارے ایسوسی ایٹڈ پریس (اے پی) کے مطابق پیر کے روز کولمبیا کے مغربی علاقے میں 7.4 شدت کا شدید زلزلہ آیا، جس کا مرکز صوبہ چوکُو کے علاقے سان ہوزے ڈیل پالمر کے قریب تھا، یہ چاکو ریجن میں واقع تقریباً 4 ہزار 800 آبادی پر مشتمل علاقہ ہے جو دارالحکومت بوگوٹا سے تقریباً 400 کلومیٹر مغرب میں واقع ہے۔

امریکی جیولوجیکل سروے کے مطابق زلزلہ زمین کے اندر تقریباً 107 کلومیٹر کی گہرائی میں آیا۔ زلزلے کے نتیجے میں ملک کے مغربی علاقوں میں متعدد عمارتیں منہدم ہوگئیں جب کہ سڑکوں اور دیگر مقامات پر ملبہ پھیل گیا۔

پیریرا شہر کے میئر کے مطابق منہدم ہونے والی عمارتوں میں متعدد افراد کے پھنسے ہونے کی اطلاعات ہیں، جس کے بعد امدادی کارکنوں اور شہریوں نے ملبے تلے دبے افراد کی تلاش شروع کردی۔

مقامی حکام کے مطابق زلزلے سے کم از کم 47 افراد ہلاک ہوئے ہیں۔ پیریرا شہر میں 18، مانی زالیس میں 2 جب کہ ویلے ڈیل کاؤکا کے علاقے میں 27 افراد کے ہلاک ہونے کی تصدیق کی گئی ہے۔ حکام کے مطابق ویلے ڈیل کاؤکا میں ہلاک ہونے والوں میں کم از کم 3 بچے بھی شامل ہیں۔

زلزلے سے پیریرا، کوئبدو، کالی اور مانی زالیس سمیت کولمبیا کے مغربی علاقوں کے کئی شہر متاثر ہوئے۔ کولمبیا کے وزیر داخلہ کے مطابق ملک بھر میں 20 سے زائد بلدیاتی علاقوں میں زلزلے کے اثرات اور نقصانات رپورٹ ہوئے ہیں۔

زلزلے کے شدید جھٹکے دارالحکومت بوگوٹا سمیت کئی علاقوں میں محسوس کیے گئے۔ پڑوسی ممالک ایکواڈور اور پاناما میں بھی زلزلے کے جھٹکے محسوس کیے گئے، تاہم وہاں بڑے پیمانے پر نقصان کی اطلاعات سامنے نہیں آئیں۔

کولمبیا کی جیولوجیکل سروس کے مطابق یہ گزشتہ ایک دہائی کے دوران ملک میں ریکارڈ کیا جانے والا سب سے زیادہ شدت کا زلزلہ ہے۔ زلزلے کے بعد 2.8 اور 4.8 شدت کے دو آفٹر شاکس بھی ریکارڈ کیے گئے، جس کے باعث حکام نے مزید جھٹکوں کے خدشے کے پیش نظر صورتحال کی نگرانی شروع کردی۔

زلزلے کے باعث ملک کے 6 ہوائی اڈوں پر بھی سرگرمیاں متاثر ہوئیں اور پروازیں معطل کردی گئیں۔ حکام کے مطابق مانی زالیس، کوئبدو، آرمینیا، کارتاگو، بویناوینتورا اور پیریرا کے ہوائی اڈے متاثر ہوئے ہیں۔

پیریرا شہر میں مقامی میڈیا کی جانب سے جاری تصاویر اور ویڈیوز میں ایئرپورٹ کی چھت کے کچھ حصے گرنے کے مناظر بھی سامنے آئے۔ زلزلے کے دوران خوف زدہ مسافروں کو چیختے ہوئے محفوظ مقامات کی جانب بھاگتے دیکھا گیا جب کہ شہر کے مختلف علاقوں میں عمارتوں کا ملبہ سڑکوں پر بکھرا نظر آیا۔

کالی شہر کے 64 سالہ ٹیکسی ڈرائیور جارج مونکایو نے بتایا کہ انہوں نے شہر کی پہاڑیوں سے عمارتیں منہدم ہونے کے بعد گرد و غبار کے بادل اٹھتے دیکھے۔ ان کے مطابق شہری اور امدادی کارکن ملبے میں زندہ افراد کی تلاش کر رہے ہیں۔

کولمبیا میں زلزلے کی شدت ایسے وقت میں سامنے آئی ہے جب پڑوسی ملک وینزویلا جون کے آخر میں آنے والے مسلسل دو شدید زلزلوں سے متاثر ہوا تھا۔ ان زلزلوں میں سیکڑوں عمارتیں تباہ اور 5 ہزار سے زائد افراد ہلاک ہوئے تھے۔

کولمبیا میں امدادی کارروائیاں جاری ہیں اور حکام کی جانب سے زلزلے سے ہونے والے جانی و مالی نقصان کا جائزہ لیا جا رہا ہے۔ ملبے تلے دبے ممکنہ افراد کی تلاش کے ساتھ ساتھ مزید آفٹر شاکس کے خطرے کے پیش نظر متاثرہ علاقوں کی نگرانی بھی جاری ہے۔