بابر اعظم نے اپنے ڈیبیو سے اب تک شاندار کارکردگی کا مظاہرہ کرتے ہوئے گرین شرٹس کی فتوحات میں اہم کردار ادا کیا ہے۔

حال ہی میں کھیلے گئے عالمی کپ میں بابر اعظم نے 474 رنز اسکور کرکے پاکستان کی جانب سے کسی ایک ورلڈکپ میں سب سے زیادہ رنز اسکور کرنے والے بلے باز کا اعزاز بھی اپنے نام کیا، انہوں نے لیجنڈری بلے باز جاوید میانداد کا 437 رنز کا ریکارڈ توڑا۔

اس کے علاوہ اگر رواں برس بابر اعظم کی کارکردگی کا جائزہ لیا جائے تو انہوں نے 18 ایک روزہ میچز میں 59 اعشاریہ 12 کی اوسط سے 946 رنز اسکور کرلئے ہیں۔

اگر بابر اعظم رواں برس 54 رنز مزید اسکور کرنے میں کامیاب ہوئے تو وہ ایک کلینڈر ایئر میں ہزار رنز اسکور کرنے والے بلے بازوں کی فہرست میں شامل ہوجائیں گے۔

بابر اعظم 2019 میں سب سے زیادہ رنز بنانے والے بلے بازوں کی فہرست میں چھٹے نمبر پر ہیں۔

دوسری جانب اگر ٹاپ آرڈر بلے بازوں کی بات کی جائے تو وہ کیوی کپتان کین ولیمسن کے بعد دوسرے نمبر پر ہیں۔

کین ولیمسن نے 59 اعشاریہ 25 کی اوسط سے رواں برس رنز 948 اسکور کئے ہیں جبکہ بابر اعظم نے 946 رنز 59 اعشاریہ 12 کی اوسط سے اسکور کئے۔

اس وقت بابر اپنے کیریئر کی بہترین پوزیشن پر پہنچ چکے ہیں، وہ آئی سی سی ون ڈے رینکنگ میں بھارتی کپتان ویرات کوہلی اور روہت شرما کے بعد تیسرے نمبر پر موجود ہیں۔