Aaj News

جمعرات, مارچ 28, 2024  
17 Ramadan 1445  

بھارت کے کشمیر میں مظالم خطے کے امن کیلئے خطرہ ہیں، وزیراعظم عمران خان

اسلام آباد:وزیراعظم عمران خان کا کہنا ہے کہ بھارت کے کشمیر میں...
شائع 06 فروری 2022 03:45pm

اسلام آباد:وزیراعظم عمران خان کا کہنا ہے کہ بھارت کے کشمیر میں مظالم خطے کے امن کیلئے خطرہ ہیں، پاکستان اور چین امن ،استحکام اور ترقی کیلئے شانہ بشانہ کھڑے ہیں۔

وزیراعظم آفس کی جانب سے وزیراعظم عمران خان کی چین کے صدر شی جن پنگ سے ملاقات کا اعلامیہ جاری کردیا گیا ،جس میں بتایا گیا ہے کہ اکتوبر 2019 میں وزیراعظم کے دورہ چین کے بعد دونوں رہنماؤں کی یہ پہلی ملاقات تھی،جس میں دونوں رہنماؤں نے پاک چین دوطرفہ تعاون کے تمام پہلوؤں کا جائزہ لیااور خوشگوار ماحول میں باہمی دلچسپی کے علاقائی اور عالمی امور پر تبادلہ خیال کیا۔

وزیراعظم عمران خان نے بیجنگ میں 24 ویں اولمپک سرمائی کھیلوں کی کامیاب میزبانی پر چین کی قیادت اور عوام کو مبارکباد دی اور چینی نئے قمری سال پر نیک خواہشات کا اظہار کیا۔

وزیراعظم نے کہا کہ چین پاکستان کا ثابت قدم ساتھی، بہترین حامی اور آئرن برادر ہے، پاکستان اور چین کے درمیان تزویراتی تعاون پر مبنی شراکت داری نے وقت کی آزمائشوں کا مقابلہ کیا،دونوں ممالک امن، استحکام، ترقی اور خوشحالی کی مشترکہ امنگوں کو عملی جامہ پہنانے میں شانہ بشانہ کھڑے رہے۔

وزیراعظم عمران خان نے پاکستان کی خودمختاری، علاقائی سالمیت، آزادی اور قومی ترقی کیلئے چین کی غیر متزلزل حمایت پر شکریہ ادا کرتے ہوئے کہا کہ پاکستان اور چین کے درمیان شراکت داری خطے میں امن و استحکام کی عکاس ہے۔

اعلامیے کے مطابق وزیراعظم نے صدر شی جن پنگ کو پائیدار ترقی، صنعتی ترقی، زرعی جدید کاری اور علاقائی رابطوں کیلئے اپنی حکومت کی پالیسیوں سےآگاہ کیا۔

عمران خان نے پاکستان کی سماجی و اقتصادی ترقی کیلئے چین کی مسلسل حمایت اور مدد کی تعریف کرتے ہوئے کہا کہ پاکستان نے سی پیک کی اعلیٰ معیار کی ترقی سے بہت فائدہ اٹھایا۔

وزیراعظم عمران خان نے صدر شی جن پنگ کے ساتھ دنیا میں بڑھتے ہوئی پولرائزیشن کے بارے میں اپنے خیالات کا اظہار کرتے ہوئے کہا کہ دنیا میں بڑھتے ہوئی پولرائزیشن سے عالمی ترقی اور ترقی پذیر ممالک کو سنگین خطرات لاحق ہیں،موسمیاتی تبدیلی، صحت کی وبائی امراض اور بڑھتی ہوئی عدم مساوات ناقابل تسخیر چیلنجز ہیں، ان چیلنجز سے صرف اقوام متحدہ کے چارٹر کے مطابق تمام اقوام کے تعاون کے ساتھ ہی نمٹا جا سکتا ہے۔

وزیراعظم نےبھارت کےغیر قانونی طور پر مقبوضہ کشمیر میں ڈھائے جانے والے مظالم پر روشنی ڈالتے ہوئے کہا کہ آر ایس ایس کی ہندوتوا ذہنیت، ہندوستان میں اقلیتوں پر ظلم علاقائی امن و استحکام کیلئے خطرہ ہے،بھارت میں تیزی سے پھیلتی عسکریت پسندی علاقائی استحکام کو نقصان پہنچا رہی ہے۔

اعلامیے میں بتایا گیا کہ وزیراعظم عمران خان نے چین کے بنیادی مفاد کے تمام امور پر پاکستان کی مکمل حمایت کا بھی اعادہ کیا۔

دونوں رہنماؤں نے تسلیم کیاکہ ایک پرامن اور مستحکم افغانستان خطے میں اقتصادی ترقی اور رابطوں کو فروغ دے گا اور دونوں رہنماؤں نے عالمی برادری سے مطالبہ کیا کہ وہ انسانی تباہی کو روکنے میں افغان عوام کی فوری مدد کرے۔

پاک چین سربراہان نے صنعتی تعاون، خلائی تعاون، اور ویکسین کے تعاون پرمشتمل متعدد معاہدوں پر دستخط کی تعریف کی جبکہ دونوں رہنماؤں نے نئے دور میں مشترکہ مستقبل کیلئے پاک چین کمیونٹی کی تعمیر کے عزم کااعادہ کیا۔

وزیراعظم عمران خان نے چینی صدر شی جن پنگ کو جلد پاکستان کا دورہ کرنے کی دعوت دی۔

pm imran khan

اسلام آباد

Chinese President

Xi Jinping

visit china

Comments are closed on this story.

تبصرے

تبولا

Taboola ads will show in this div