سیمنٹ فیکٹری میں تلخ کلامی پر ڈپٹی منیجر وقاص بنگش نے فائرنگ کرکے ڈپٹی جنرل منیجر عبدالوہاب اور عبدالصمد نامی افراد کو قتل کردیا اور موقع سے فرار ہوگیا۔

ضلع میانوالی کے شہر داؤد خیل میں واقع سیمنٹ فیکٹری میں معمولی تلخ کلامی پر ڈپٹی منیجر نے اپنے ساتھی ڈپٹی منیجر کو ایک ملازم سمیت فائرنگ کرکے قتل کردیا۔

پولیس کے مطابق وقاص بنگش نامی ملزم کی ڈپٹی جنرل منیجر عبدالوہاب اور عبدالصمد نامی افراد سے معمولی تلخ کلامی ہوئی تھی، جس پر طیش میں آکر ملزم نے فائرنگ کردی۔

حکام نے بتایا کہ وقاص بنگش کی فائرنگ سےعمر جٹ نامی شخص زخمی جب کہ عبدالوہاب اور عبدالصمد نامی افراد موقع پر ہی دم توڑ گئے، اور فائرنگ کے بعد ملزم موقع سے فرارہوگیا۔

واقعے کی اطلاع ملتے ہی ڈی پی او میانوالی مطیع اللہ خان نے ڈی ایس پی آرگنائز کرائم ایکٹنگ ڈی ایس پی سرکل داؤد خیل سے واقعے کے حوالے سے رپورٹ طلب کر لی۔