نگران صوبائی وزیرِ اطلاعات، اقلیتی امور و سماجی تحفظ و صدر آرٹس کونسل محمد احمد شاہ نے ”اردو باغ“ گلستانِ جوہر کراچی میں شاعرِ انقلاب جوش ملیح آبادی سے منسوب“ایوانِ جوش“ کا افتتاح کردیا۔

جوش ملیح آبادی کی 129 ویں سالگرہ کے موقع پر پر نگران صوبائی وزیر اطلاعات، اقلیتی امور و سماجی تحفظ محمد احمد شاہ نے کہا کہ جوش صاحب کے بارے میں بہت سی یادیں اور باتیں ہم نے مشتاق احمد یوسفی صاحب اور ڈاکٹر عالیہ امام کی زبان سے سنیں۔

نگران صوبائی وزیر محمد احمد شاہ نے کہا کہ اقبال حیدر صاحب نے اپنی عمر بھر کی کمائی لگاکر ایوانِ جوش کی عمارت بناکر ہمیں دی ہے جو ایک مثالی اور قابلِ تقلید کام ہے۔

انہوں نے کہا کہ بحیثیت وزیر ان کی کوشش ہوگی کہ وہ ایوانِ جوش کے لئے سرکار کی جانب سے کچھ معاونت مہیا کرنے میں اپنا کردار ادا کرسکیں۔

اس موقع پر معروف شاعر افتخار عارف نے کہا کہ وزیر اطلاعات سے گزارش ہے کہ اردو باغ آنے والی سڑکیں ٹھیک کروائیں۔

تقریب میں ڈاکٹر عالیہ امام، افتخار عارف، ڈاکٹر ہلال نقوی اور پروفیسر سحر انصاری سمیت دیگر نے خطاب کیا۔

تقریب سے خطاب میں مقررین نے جوش ملیح آبادی کو زبردست خراج عقیدت پیش کیا ،ان کے کلام کے اقتباسات سنائے اور ایک سماں باندھ دیا۔

تقریب کے حاضرین میں شہر کے معروف دانشوروں ، قلمکاروں اور فن کاروں نے شرکت کی۔