افغان طالبان حکومت کی جانب سے ملک میں خواتین کی اعلیٰ تعلیمی پر پابندی کا باضابطہ نوٹی فکیشن جاری ہونے کے بعد مرد اساتذہ نے استعفے دینا شروع کردیئے ہیں۔
افغانستان سے ملنے والی اطلاعات کے مطابق طالبان کے نئے حکم نامے کے بعد قندھار میں یونیورسٹی کی خاتون طالبات کو امتحانات مین حصہ لینے سے روک دیا گیا۔ جب کہ کابل میں یونیورسٹی کی طالبات کو ہوسٹلز سے نکال دیا گیا۔
ان واقعات کے خلاف ردعمل سامنے آ رہا ہے۔
سوشل میڈیا پر شیئر ہونے والی ایک ویڈیو میں میڈیکل یونیورسٹی کے مرد طلبہ کو احتجاجاً واک آؤٹ کرتے دیکھا جا سکتا ہے۔ اطلاعات کے مطابق کئی مرد اساتذہ نے استعفے دے دیئے ہیں۔
پامیر نیوز کے مطابق یہ ویڈیو ننگرہار میڈیکل یونیورسٹی کی ہے جہاں مرد اور خواتین طلبا نے پابندی کے خلاف احتجاجی مظاہرہ کیا۔
افغان طالبان نے منگل کے روز خواتین کی اعلیٰ تعلیم پر پابندی کا نوٹی فکیشن جاری کیا تھا۔
