فیس بک کا کہنا ہے کہ کینیڈا کے ایک نئے قانون کے تحت سوشل میڈیا کمپنیوں کو خبروں کے لیے پبلشرز کو ادائیگی کرنے پر مجبور کیا جائے گا۔

فیس بک کی مالک کمپنی میٹا پلیٹ فارمز نے اعلان کیا ہے کہ وہ کینیڈا میں تمام صارفین کے لئے فیس بک اور انسٹاگرام پر خبروں تک رسائی ختم کر دے گا کیونکہ ملک کی پارلیمنٹ نے انٹرنیٹ کی بڑی کمپنیوں کو پبلشرز کو ادائیگی کرنے پر مجبور کرنے کے لئے قانون سازی کی منظوری دی ہے۔

آن لائن نیوز ایکٹ کے نام سے مشہور اس قانون کو جمعرات کو سینیٹ نے منظور کیا تھا اور توقع ہے کہ جلد ہی اسے باضابطہ طور پر منظور کرلیا جائے گا۔

میٹا کی جانب سے جاری بیان میں کہا گیا ہے کہ ’آج ہم اس بات کی تصدیق کر رہے ہیں کہ آن لائن نیوز ایکٹ کے نفاذ سے قبل کینیڈا میں تمام صارفین کے لیے فیس بک اور انسٹاگرام پر خبروں کی دستیابی ختم کر دی جائے گی۔‘

یہ قانون فیس بک اور الفابیٹ کے گوگل جیسے پلیٹ فارمز کو تجارتی معاہدوں پر بات چیت کرنے اور نیوز پبلشرز کو ان کے مواد کے لئے ادائیگی کرنے پر مجبور کرنے کے قواعد کا خاکہ پیش کرتا ہے، یہ اقدام 2021 میں آسٹریلیا میں منظور کردہ ایک اہم قانون کی طرح ہے۔

یاد رہے کہ کینیڈا کی وفاقی حکومت اب تک تبدیلیوں کی تجاویز کو مسترد کرتی رہی ہے۔ رواں ماہ کے اوائل میں وزیر اعظم جسٹن ٹروڈو نے کہا تھا کہ میٹا اور گوگل قانون سازی کے خلاف مہم چلاتے ہوئے ’غنڈہ گردی کے ہتھکنڈے‘ استعمال کر رہے ہیں۔