گورنر سندھ کامران ٹیسوری نے گورنر ہاؤس میں میڈیا سے گفتگو کرتے ہوئے کہا کہ کسی بھی مسلمان کو شراب لیتے دیکھا گیا تو اسے فوری گرفتار کیا جائے گا جبکہ مسلمانوں کو شراب بیچنے والے کی دکان سیل کی جائے گی۔

اسٹریٹ کرائم کے حوالے سے کامران ٹیسوری کا کہنا تھا کہ کراچی میں اسٹریٹ کرائم میں اضافہ ہورہا ہے، صوبے میں کچے کے ڈاکوؤں کا اثر بھی بڑھتا جا رہا ہے، جو لوگ موبائل چھینتے ہیں وہ نشے میں ہوتے ہیں اور مارنے میں ایک سیکنڈ نہیں لگاتے۔ میں نے اسٹریٹ کرائم کے خلاف بیان دیا تو جواب آیا کہ اپنے کام سے کام رکھیں۔

گورنر کا کہنا تھا کہ صوبائی وزیر داخلہ نے کہا جہاں کاروبار ہوگا وہاں کرائم ہوگا، لیکن دنیا میں ایسا نہیں ہے۔ کوئی پارٹی نہیں چاہتی شہر میں کرائم ہو۔

انھوں نے کہا کہ خوشی کی بات ہے پیپلزپارٹی چیئرمین بلاول نے کہا کہ کراچی کو اون کریں گے، ہر اچھےکام میں پیپلزپارٹی کو سپورٹ کرنا چاہیے، تاہم ماننا ہوگا کہ کراچی اور حیدرآباد میں ایم کیوایم کو مینڈیٹ ملا ہے۔

گورنر سندھ نے کہا کہ گورنر ہاؤس میں مدینہ کی ریاست کے اصولوں کو اپنایا جائے گا، گورنر ہاؤس کے اکاؤنٹس کو سود سے پاک کیا جائیگا اور 5 وقت نماز کی پابندی کی جائیگی۔

گورنر سندھ نے جلد حیدرآباد میں آئی ٹی کلاسز کے حوالے سے ٹیسٹ کے انعقاد کا عندیہ دیا کہا کہ ہم نیاز اسٹیڈیم میں 2 لاکھ سے زائد لوگوں کا آئی ٹی ٹیسٹ لینے جارہے ہیں، 2 لاکھ میں سے 50 ہزار لوگوں کے لئے آئی ٹی یونیورسٹی کا انتطام اور اہتمام کررہے ہیں۔

ٓ