کولمبیا کے صدر گستاو پیٹرو نے کہا کہ وہ غزہ میں اسرائیل کے اقدامات پر اس کے ساتھ سفارتی تعلقات توڑ دیں گے۔

غیرملکی خبررساں ادارے ’اے ایف پی‘ کے مطابق کولمبیا کے صدر اس سے قبل بھی اسرائیلی وزیر اعظم بنجمن نیتن یاہو پر کڑی تنقید اور بین الاقوامی عدالت انصاف میں اسرائیل پر نسل کشی کا الزام لگانے والے جنوبی افریقہ کے مقدمے میں شامل ہونے کی درخواست کر چکے ہیں۔

مزدوروں کے عالمی دن کے موقع پر منعقد ’مارچ‘ سے خطاب کے دوران انہوں نے کہا کہ ہم کل اسرائیل کے ساتھ سفارتی تعلقات ختم کر دیں گے، اسرائیل ایک ایسی ریاست ہے جس کا صدر نسل کشی کررہا ہے۔

انہوں نے مزید کہا کہ غزہ کے واقعات کے سامنے ممالک غیر فعال نہیں ہو سکتے۔

دوسری جانب اسرائیلی وزیر خارجہ اسرائیل نے گستاو پیٹرو پر ”یہودی دشمن اور نفرت سے بھرپور“ ہونے کا الزام لگایا۔ انہوں نے کہا کہ کولمبیا کا یہ اقدام حماس کے لیے ایک انعام تھا،

واضح رہے کہ بولیویا نے گزشتہ سال اکتوبر کے آخر میں اسرائیل سے تعلقات منقطع کر لیے تھے جب کہ کولمبیا، چلی اور ہونڈوراس سمیت لاطینی امریکا کے کئی دیگر ممالک نے اپنے سفیروں کو واپس بلا لیا ہے۔