حکومت نے پیٹرول اور ڈیزل گاڑیوں کی حوصلہ شکنی اور الیکٹرک گاڑیوں کو فروغ دینے کے لیے نئی ”انرجی وہیکل لیوی“ نافذ کر دی، ایف بی آر نے مختلف سی سی کی گاڑیوں پر لیوی کے نفاذ کا نوٹیفکیشن جاری کر دیا۔

پٹرول اور ڈیزل پر چلنے والی گاڑیوں کی حوصلہ شکنی کیلئے فیڈرل بورڈ آف ریونیو نے پیٹرول اورڈیزل سے چلنے والی گاڑیوں پرنئی لیوی کے نفاذ کانوٹیفکیشن جاری کردیا۔

نوٹی فیکیشن کے مطابق 1300 سی سی سے چھوٹی مقامی ودرآمدی گاڑیوں پر ایک فیصد انرجی وہیکل لیوی لاگو ہوگی ، پک اپ، بسوں اورٹرکوں پربھی ایک فیصد لیوی عائد کی گئی ہے۔

1300 سے1800 سی سی گاڑیوں پر2 فیصد انرجی وہیکل لیوی نافذ ہوگا، 1800 سی سی سے بڑی گاڑیوں پر 3 فیصد لیوی لاگو ہوگی۔

ایف بی آر کا کہنا ہے کہ لیوی کا مقصد صارفین کوالیکٹرک گاڑیوں کی طرف راغب کرنا ہے پاکستان میں تیار یا اسمبلڈ گاڑیوں پرلیوی مینوفیکچررادا کرے گا جبکہ درآمدی گاڑیوں پر لیوی متعلقہ خریدار ادا کرنے کا پابند ہوگا۔