فیلڈ مارشل سید عاصم منیر نے کہا ہے کہ بلوچستان پاکستان کی ترقی، خوشحالی اور غیر معمولی اہمیت کا حامل صوبہ ہے. بھارتی حمایت یافتہ عناصر صوبے میں بدامنی پھیلانے کی کوششیں کر رہے ہیں جنہیں ہر صورت ناکام بنایا جائے گا۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے جنرل ہیڈکوارٹرز (جی ایچ کیو) میں 18ویں نیشنل ورکشاپ بلوچستان کے شرکاء سے ملاقات کی اور تفصیلی تبادلہ خیال کیا۔

آئی ایس پی آر کے مطابق ورکشاپ میں بلوچستان کی سماجی و معاشی ترقی اور صوبے کی اسٹریٹجک اہمیت پر غور کیا گیا۔

چیف آف ڈیفنس فورسز سید عاصم منیر نے بلوچستان کے عوام کی استقامت اور حب الوطنی کو سراہتے ہوئے کہا کہ بلوچستان پاکستان کی ترقی، خوشحالی اور مستقبل کے لیے کلیدی حیثیت رکھتا ہے۔

انہوں نے وفاقی اور صوبائی حکومتوں کی جانب سے جاری ترقیاتی منصوبوں اور عوام دوست اقدامات کو سراہتے ہوئے کہا کہ کہ ان کا مقصد صوبے کے عوام کے معیارِ زندگی کو بہتر بنانا اور بلوچستان کے وسیع معاشی وسائل کو عوام کی فلاح کے لیے بروئے کار لانا ہے۔

آئی ایس پی آر کے مطابق فیلڈ مارشل عاصم منیر نے سول سوسائٹی کے مثبت اور تعمیری کردار کو بھی اجاگر کیا، خاص طور پر منفی پراپیگنڈے کے توڑ اور پائیدار ترقی کے فروغ میں ان کی کاوشوں کو اہم قرار دیا۔

سیکیورٹی صورتحال پر بات کرتے ہوئے فیلڈ مارشل سید عاصم منیر نے کہا کہ بھارت کے حمایت یافتہ عناصر بلوچستان میں بدامنی پھیلانے اور ترقی کے عمل کو سبوتاژ کرنے کی کوششیں کر رہے ہیں، تاہم سیکیورٹی فورسز ان ناپاک عزائم کو ناکام بنانے کے لیے پوری طرح پُرعزم ہیں اور صوبے سے دہشت گردی و بدامنی کے خاتمے تک کارروائیاں جاری رہیں گی۔

فیلڈ مارشل عاصم منیر نے واضح کیا کہ ملکی خودمختاری اور علاقائی سالمیت کی کسی بھی براہِ راست یا بالواسطہ خلاف ورزی کا بھرپور اور فیصلہ کُن جواب دیا جائے گا۔

نشست کے اختتام پر شرکاء کے ساتھ سوال و جواب کا سیشن بھی منعقد ہوا، جس میں فیلڈ مارشل سید عاصم منیر نے بلوچستان کی ترقی اور سیکیورٹی سے متعلق مختلف سوالات کے جوابات دیے۔