سابقہ مِس ولڈ اور بولی وڈ کی خوبرو حسینہ سشمیتا سین کی شادی کے چرچے اکثر و بیشتر میڈیا کی خبروں میں گردش کرتے رہتے ہیں، 43 سالہ اداکارہ اب تک اپنی مرضی کا دولہا ڈھونڈنے میں ناکام لیکن کیا واقعی ایسا ہے؟

غیرملکی میڈیا رپورٹس میں ان دنوں یہ افواہیں گردش کررہی ہیں کہ سابقہ مِس یونیورس کو خود سے 15 سال چھوٹا لڑکا شادی کے لئے مل گیا ہے تاہم اب تک اس بات کی کسی جانب سے تصدیق نہیں کی گئی ہے۔

بھارتی شوبز انڈسٹری میں آج کل ایک نیا ٹرینڈ زور پکڑ رہا ہے، سب سے پہلے پریانکا اور نِک جونز کی جوڑی منظر عام پر آئی دونوں کی عمر میں تقریبا 10 سال کا فرق ہے۔

اس کے بعد مِلند اور انکیتا منظر عام پر آئے، ان دونوں کی عمر میں تو آدھا فرق ہے اور اب یہ خبر سامنے آئی ہے کہ 43 سالہ سشمیتا بھی خود سے 15 سال چھوٹے لڑکے کے ہمراہ ڈیٹنگ کررہی ہیں۔

سشمیتا کو لے کر یہ خبر سامنے آرہی ہے کہ وہ روہمن شال نامی ایک نوجوان ماڈل کے ساتھ ڈیٹنگ کررہی ہیں، دونوں کی ملاقات 2 ماہ قبل ایک فیشن شو میں ہوئی اور وہیں سے دونوں کے درمیان قربتوں کا آغاز ہوا۔

ان دونوں کو ایئرپورٹ پر ایک ساتھ دیکھا جاچکا ہے اس کے علاوہ وہ سشمیتا کے گھر بھی تواتر سے آتے رہتے ہیں، سشمیتا کی دونوں لے پالک بیٹیوں کے ساتھ بھی ان کا بانڈ قابل دید ہے۔ سابقہ مِس یونیورس اب روہمن شال کے ساتھ اچھا خاصا وقت گزارتی ہیں۔

ذرائع نے دعویٰ کیا ہے کہ ان کے رشتے کے بارے میں کچھ کہنا قبل از وقت لگتا ہے لیکن یہ بات ضرور ہے کہ دونوں کے تعلقات دوستی سے کچھ بڑھ کر ہی ہیں۔

سشمیتا کے نام کو اس سے قبل بھی متعدد ناموں کے ساتھ جوڑا جا چکا ہے جن میں ہدایتکار وِکرم بھٹ، پاکستانی لیجنڈری فاسٹ بولر وسیم اکرم، سبیر بھاٹیا، اداکار رنبیر ہودا اور مدثر عزیز شامل ہیں۔