پی آئی اے ہوٹلز کی فروخت ،وفاق سے جواب طلب
لاہور :لاہور ہائیکورٹ نے پی آئی اے کے اندرون اور بیرون ملک موجود ہوٹلز کی فروخت کے خلاف دائر درخواست پر وفاقی حکومت کو نوٹس جاری کرتے ہوئے جواب طلب کر لیا۔
لاہور ہائیکورٹ کے جسٹس سید منصور علی شاہ نے کیس کی سماعت کی۔درخواست گزار بیرسٹر سید محمد جاوید اقبال جعفری نے عدالت کو بتایا کہ حکومت نے نجکاری کے نام پر اربوں ڈالر کے قومی اثاثے فروخت کرنے کا سلسلہ شروع کر رکھا ہے۔
پی آئی اے کے ہوٹلوں کی فروخت کے لئے قومی اسمبلی سے منظوری حاصل نہیں کی گئی۔ انہوں نے کہاکہ لندن اور نیو یارک میں موجود اٹھارہ ارب ڈالر مالیت کے ہوٹلز کو بارہ ارب روپے میں فروخت کیا جا رہا ہے۔ پیرس میں موجود سکرائب ہوٹل اور کراچی میں موجود پی آئی اے کے سکائی وے ہوٹل کو بھی اونے پونے فروخت کرنے کی تیاریاں مکمل ہیں۔ حکومت کے پاس پی آئی اے کے اربوں ڈالر مالیتی ہوٹلز کی فروخت کا کوئی قانونی جواز موجود نہیں۔
عدالت ان ہوٹلز کی فروخت روکنے کے احکامات صادر کرے۔عدالت نے دلائل سننے کے بعد وفاقی حکومت کو آٹھ مارچ کے لئے نوٹس جاری کرتے ہوئے جواب طلب کر لیا۔
اس کہانی پر تبصرے بند ہیں۔