اسلام آباد: وزیراعظم عمران خان نے کہا ہے کہ ایم ٹی آئی ایکٹ ہسپتالوں کے انتظامی امور بہتر بنانے کیلئے ہے۔

وزیراعظم عمران خان نے سماجی رابطے کی ویب سائٹ پر ٹویٹ کرتے ہوئے کہا ایم ٹی آئی ایکٹ نجکاری نہیں ہے، یہ ایکٹ اصلاحاتی منصوبے کا حصہ ہے، تمام ہسپتال سرکاری ہی رہیں گے، بہتر انتظامات سے مریضوں کو سہولتیں ملیں گی۔

یاد رہے کہ رواں سال مئی میں وزیراعظم کے معاون خصوصی ڈاکٹر ظفر مرزا کا کہنا تھا کہ 2020 تک ہر پاکستانی ہیلتھ انشورنس کی سہولت سے مستفید ہوگا، پاکستان کے 66 اضلاع میں ہیلتھ انشورنس اسکیم متعارف کرادی گئی ہے۔

معاون خصوصی برائے صحت کا کہنا تھا کہ پاکستان عالمی صحت عامہ سے متعلق ذمہ داریوں سے بخوبی آگاہ ہے، پاکستان عالمی صحت عامہ کی بہتری کے لیے کردار ادا کرتا رہے گا۔

ڈاکٹر ظفر مرزا کا کہنا تھا کہ حکومت پاکستان شعبہ صحت میں اہم اصلاحات کررہی ہے، پاکستان کو مکمل فلاحی ریاست بنانا وزیراعظم عمران خان کی اولین ترجیح ہے