اسلام آباد:کینیڈین حکومت کی درخواست پرپی آئی اے نے بین الاقوامی فلائٹ آپریشن جزوی بحال کردیا ،قومی ایئرلائن کی2پروازیں 600 مسافروں کو لے کر ٹورنٹو روانہ ہو گئیں۔

کورونا وائرس کی موجودہ صورتحال میں پی آئی اے کافلائٹ آپریشن  جزوی طور پر بحال ہوگیا،کینیڈین حکومت کی درخواست پر قومی ایئرلائن کی 2خصوصی پروازیں ٹورنٹو روانہ کردی گئیں۔

ذرائع کے مطابق،600 مسافر لاہور  اور کراچی ایئرپورٹس سے پی آئی اے کے خصوصی طیاروں پر سوار ہوئے،کرچی سے پرواز پی کے 781 اور لاہور سے پی کے 789 کینیڈاروانہ ہوئی ۔

ٹورنٹو روانگی سے قبل ایئرپورٹ پر مسافروں کی جامع اسکریننگ اور ان کے سامان سمیت ڈس انفیکشن اسپرے کیا گیا جبکہ پروازوں کی مانیٹرنگ کیلئے پی آئی اے کی اعلی انتظامیہ خود ایئر پورٹ پر موجود تھی۔

ترجمان پی آئی اے نے بتایا کہ کینیڈا سے دونوں پروازیں بغیر مسافروں کے خالی پاکستان واپس آئیں گی ،دیگر پروازوں کی بکنگ کیلئے پی آئی اے کے دفاتر سے مسلسل رابطے میں رہیں،  ہجوم سے بچنے کیلئے آن لائن بکنگ اور ٹکٹنگ کو ترجیح دیں۔

 دوسری طرف حکومت نے ڈومیسٹک پروازوں کو منسوخ کرنے کی تاریخ میں 2اپریل سے 11 اپریل تک توسیع کر دی  تاہم اسلام آباد سے گلگت اور اسکردو کی پروازیں معمول کے مطابق آپریٹ ہوتی رہیں گی۔

پی آئی اے کا خصوصی طیارہ چین سے امدادی سامان لے کر اسلام آباد پہنچ گیا

پی آئی اے کا ایک اورخصوصی طیارہ چین سے امدادی سامان لے کر اسلام آباد پہنچ گیا،پرواز پی کے 8552 بیجنگ سے اسلام آباد پہنچی۔

 ترجمان این ڈی ایم اے کے مطابق سامان میں 100 تھرمل سکینر، 9 لاکھ ماسک، 60ہزار حفاظتی عینکیں اور33 سو سے زائد حفاظتی سوٹ ہیں،سامان میں اڑھائی لاکھ دستانے اور تھرما میٹر  شامل ہیں۔

کسٹمز کلیئرنس کے بعد سامان این ڈی ایم اے حکام کے حوالے کردیا گیا، پی آئی اے کا خصوصی طیارہ گزشتہ روز امدادی سامان لینے چین گیا تھا ۔