بھارت کو کشمیریوں پرظلم اورحقوق سلب کرنے سے روکنا ہوگا، وزیراعظم
اسلام آباد:وزیراعظم عمران خان نے دنیا پرواضح کیا ہے کہ بھارت کو کشمیریوں پرظلم اورحقوق سلب کرنے سے روکنا ہوگا،بھارتی اقدامات جنوبی ایشیا کے امن وسلامتی کیلئے خطرہ ہیں۔
وزیراعظم عمران خان نے سماجی رابطے کی ویب سائٹ ٹوئٹر پر مقبوضہ کشمیر کی صورتحال پرٹویٹ کرتے ہوئے کہا کہ بھارت نے پہلے مقبوضہ کشمیرکےغیر قانونی الحاق کوشش کی،اب بھارت مقبوضہ کشمیرمیں آبادی کا تناسب بدل رہا ہے۔
وزیراعظم کا مزید کہنا تھا کہ بھارت نے غیرقانونی طور پر اپنے 25 ہزارشہریوں کو کشمیرکا ڈومیسائل جاری کیااور ان بھارتی اقدامات سے کشمیر کو حاصل شدہ عالمی حقوق مزید سلب ہوں گے،غیرمقامی افراد کو ڈومیسائل کا اجرا ءبین الاقوامی سطح پرتسلیم شدہ کشمیریوں کے حقوق کی کھلی خلاف ورزی ہیں۔
پہلےمقبوضہ جموں وکشمیرپرغیرقانونی قبضہ جمانےکی بھارتی کوشش اوراب 25 ہزار ہندوستانی شہریوں کوڈومیسائل سرٹیفکیٹس کےاجراء سمیت مقبوضہ وادی میں آبادی کا تناسب بدلنےکےتمام بھارتی حربےسراسرغیرقانونی اورچوتھےجینیوا کنونشن سمیت بین الاقوامی قانون اورسلامتی کونسل کی قراردادوں کےمنافی ہیں۔
— Imran Khan (@ImranKhanPTI) June 30, 2020
عمران خان نے کہا کہ بھارت غیر قانونی اقدامات سےجنوبی ایشیا کے امن اور سلامتی کوخطرے میں ڈال رہا ہے لہذا بھارت کو اس غیرقانونی ناقابل قبول اقدام سے ہرصورت روکنا ہوگا۔
وزیراعظم عمران خان نے مزید کہنا تھا کہ بھارتی اقدام اقوام متحدہ سیکیورٹی کونسل کی قراردادوں،بین الاقوامی قوانین اورجنیوا کنونشن کی خلاف ورزی ہےاوریہ کہ میں نے اس بارے میں اقوام متحدہ کے سیکریٹری جنرل سے رابطہ کیاجبکہ دنیا کے دیگر رہنماؤں سے بھی رابطے کررہا ہوں۔
میں نےاقوام متحدہ کےسیکرٹری جنرل سے رابطہ کیاہےاور میں دیگرعالمی رہنماؤں سے بھی بات کررہاہوں۔اس ناقابلِ قبول سمت میں بھارت کی پیش قدمی روکناضروری ہےکہ اس سےاہلِ کشمیرکےقانونی اوربین الاقوامی طورپرضمانت شدہ حقوق پرمزید زد پڑتی ہےاورجنوبی ایشیاء میں امن وسلامتی کوشدیدصدمہ پہنچتاہے۔
— Imran Khan (@ImranKhanPTI) June 30, 2020
Comments are closed on this story.