وزیر دفاع پرویز خٹک نے جاپانی سفیر سے کہا کہ وہ سمندری اور صنعتی پیداوار کے شعبوں میں سرمایہ کاری کرے اور پاک چین اقتصادی راہداری کے منصوبے میں باہمی مفاد پرمبنی شراکت داری کے ذریعے اقتصادی سرگرمیوں کوفروغ دے۔

بدھ کواسلام آباد میں جاپانی سفیر کونیہوری مٹسوڈاسے گفتگو کرتے ہوئے انہوں نے پاکستان کی ترقی وخوشحالی میں جاپان کے تعاون کو سراہا۔

افغانستان اور جنوبی ایشیاء میں امن واستحکام کو فروغ دینے میں جاپان کے کردار کی تعریف کرتے ہوئے پرویز خٹک نے اس امر پر بھی زوردیا کہ جنوبی ایشیاء میں پائیدارامن مسئلہ کشمیر کے پرامن حل سے منسلک ہے۔

جاپانی سفیر نے یقین دہانی کرائی کہ ان کی حکومت پاکستان کے ساتھ باہمی تعاون کی راہوں کی تلاش جاری رکھے گی۔