کراچی: ڈومیسٹک کرکٹ میں رنز کے انبار لگادینے والے مڈل آرڈر بلے باز فواد عالم نے قائداعظم ٹرافی کے پہلے میچ میں بھی سنچری داغ دی۔

تفصیلات کے مطابق سندھ کی نمائندگی کرتے ہوئے انہوں نے سنٹرل پنجاب کے خلاف کیرئیر کی 35 ویں سینچری اسکور کی۔

میڈیا کانفرنس کے دوران مڈل آرڈر بلے باز سے سوال کیا گیا کہ انٹرنیشنل کرکٹ سے طویل دوری نے آپ کو ایسا کھلاڑی بنا دیا جو صرف ڈومیسٹک میچز میں اچھا پرفارم کرتا ہے تو اس پر وہ ناراض ہوگئے اور کہا کہ یہ صرف آپ کی سوچ ہوسکتی ہے میں نے اور کسی سے ایسی کوئی بات نہیں سنی۔

واضح رہے کہ فواد عالم کو 11 سال بعد ٹیسٹ کرکٹ میں انگلینڈ کے خلاف دوسرے ٹیسٹ میں پاکستان کی نمائندگی کا موقع ملا تو وہ اپنی پہلی اننگز میں بناء کوئی رن بنائے پویلین لوٹ گئے تھے۔ اس کے علاوہ تیسرے ٹیسٹ کی پہلی اننگز میں وہ 21 رنز بناسکے اور دوسری اننگز میں صفر پر ناٹ آؤٹ رہے تھے۔