"چاہتا ہوں بہترین کارکردگی دکھا کر پاکستانی شائقین کو محظوظ کروں"
کراچی: پہلی بار پاکستان سپر لیگ کا حصہ بننے والے جنوبی افریقہ کے اسٹار کرکٹر اور سابق کپتان فاف ڈوپلیسی نے پشاور زلمی کو ٹائٹل جتوانے کی خواہش کا اظہار کرتے ہوئے کہا ہے کہ پاکستان سپر لیگ دنیا کی بہترین لیگز میں سے ایک ہے۔
ڈوپلیسی پشاور زلمی کی نمائندگی پر خوش ہیں، ان کا کہنا ہے کہ پاکستان سپر لیگ کا حصہ بن کر بہت اچھا محسوس ہورہا ہے، یہ دنیا کی بہترین لیگ میں سے ایک ہے۔
انہوں نے اپنے عزائم کا اظہار کرتے ہوئے کہا ہے کہ اپنی کارکردگی سے پشاور کو فائنل میں پہنچا کر ٹائٹل جتوانا چاہتا ہوں۔ پشاور زلمی ایک کامیاب فرنچائز اور ٹیم ہے، جس کا حصہ بن کر پرجوش ہوں۔
فاف ڈوپلیسی کا کہنا ہے کہ پشاور زلمی میں شامل کھلاڑیوں سے اچھی دوستی ہوگئی ہے، خصوصاً شعیب ملک کے ساتھ لیگ کرکٹ میں کھیلا ہوا ہے، اپنا وقت انجوائے کررہا ہوں۔
سابق جنوبی افریقی کپتان نے کہا ہے کہ چاہتا ہوں اپنی بہترین کارکردگی دکھا کر پاکستانی فینز کو محظوظ کروں۔
انہوں نے بتایا کہ انڈر 19 ٹیم کا کپتان اور ٹیسٹ ٹیم کے ساتھ پاکستان آچکا ہوں، دوبارہ آکر اچھا لگ رہا ہے، ورلڈ الیون ٹیم کے ساتھ آنے کا لمحہ بھی یادگار تھا۔
انہوں نے مزید کہا کہ خوشی ہے پاکستان میں انٹرنیشنل کرکٹ مکمل بحالی کی جانب بڑھ چکی ہے۔
Comments are closed on this story.