اسٹیٹ بینک آف انڈیا نے بھی پاکستانی پارٹی گرل کا سہارا لے لیا۔

اسٹیٹ بینک آف انڈیا نے پاکستانی "پارٹی گرل" دنانیر مبین سے متاثر ہوکر سوشل میڈیا پر اپنے صارفین کے لیے نئی مہم لانچ کردی۔

چند روز قبل سوشل میڈیا پر "پارٹی گرل" دنا نیر کی وائرل ویڈیو کو دنیا بھر میں پسند کیا گیا۔ شوبز ستاروں سے لے کر عام آدمی تک ہر کسی کو دنانیر کے بولنے کا انداز اتنا پسند آیا کہ سب نے دنانیر کے ہی انداز میں بول کر ویڈیو بنائی اور سوشل میڈیا پر اپ لوڈ کی۔

پاکستان میں ویڈیو وائرل ہونے کے بعد پارٹی گرل کے چرچے پڑوسی ملک بھارت میں بھی جا پہنچے ہیں جہاں دنانیر کے بولنے کے انداز کو خوب پسند کیا جارہا ہے، اس بات کا اندازہ بھارت کے مرکزی بینک کے ٹوئٹر اکاؤنٹ سے لگایا جاسکتا ہے جس نے پاکستانی ’پارٹی گرل‘ سے متاثر ہوکر ان کے بولنے کے انداز میں ہی بھارتی صارفین کے لیے مہم لانچ کردی ہے۔

اسٹیٹ بینک آف انڈیا کے ٹوئٹر اکاؤنٹ پر بھارتی صارفین کے لیے آفرز سے متعلق ایک تصویر شئیر کی گئی جس میں کہا گیا کہ ’یہ ہمارا ایپ ہے، یہ آفرز ہے اور یہ ہماری پارٹی ہورہی ہے۔

بھارت کے مرکزی بینک کی جانب سے پاکستانی پارٹی گرل کی لائنز چرانے کے بعد ٹوئٹر پر بھی ایک بحث چھڑگئی ہے جس میں پاکستانیوں کا کہنا ہے کہ بھارتی بینک نے جہاں سے لائن چرائی ہے اس کو کریڈٹ بھی دے۔