دبئی میں داخلے کیلئے رہائشی ویزا رکھنے والے پاکستانیوں پر سے کورونا ویکسی نیشن کارڈ دکھانے کی شرط ہٹادی گئی۔

متحدہ عرب امارات نے اپنا نیا سفری ہدایت نامہ جاری کیا ہے ۔ہدایت نامے کے مطابق دبئی کا رہائشی ویزا رکھنے والے پاکستانیوں کو اب ویکسی نیشن سرٹیفیکٹ کے بغیر اب وہاں پر داخلے کی اجازت ہے۔

نئی ہدایات کے مطابق دبئی کے رہائشی ویزا کے حامل پاکستانیوں کو کورونا ویکسی نیشن کارڈ کے بغیر داخلے کی اجازت ہے ۔

تاہم مسافروں کیلئے لازمی ہے کہ وہ انٹری کیلئے اجازت نامہ کا حصول ممکن بنائیں ۔ جبکہ مسافروں پر چار گھنٹے پہلے ریپڈ ٹیسٹ اور اڑتالیس گھنٹے قبل پی سی آر ٹیسٹ کی شرط برقرار ہے۔

ہدایت نامے کے مطابق مسافروں کا دبئی پہنچنے پر بھی کورونا ٹیسٹ کیا جائیگا۔ اس میں امارت کی قومیت رکھنے والے افراد کو ان شرائط سے بری الزمہ قرار دیا گیا ہے۔

متحدہ عرب امارات نے پانچ اگست سے پاکستان ، بھارت ،نائیجیریا اور بعض دوسرے ممالک سے ٹرانزٹ پروازوں کے ذریعے آنے والے مسافروں کے ملک میں داخلے پرعاید پابندی ختم کرنے کا اعلان کیا ہے۔

حالیہ ہدایت نامے کا اطلاق نیپال ،نائیجریا، پاکستان ، سری لنکا، اور یوگینڈا کے شہریوں پر ہوگا۔

اس سے پہلے یواے ای نے چند ماہ قبل کرونا وائرس کی وبا کے پیش نظر جنوبی ایشیا اور افریقا کے بعض ممالک سے آنے والے مسافروں کے ملک میں داخلے پر پابندی عاید کردی تھی۔

مزید اس حوالے سے کہا گیا تھا کہ جن ممالک کی پروازوں کو معطل کیا گیا ہے،وہاں کے مسافراپنے ہوائی اڈوں سے ٹرانزٹ پروازوں کے ذریعے جمعرات سے یواے ای کا سفراختیارکرسکیں گے ۔

ہدایت نامے کے مطابق اس کی شرط یہ ہوگی کہ انھیں اپنی روانگی سے 72 گھنٹے قبل کیے گئے پی سی آر ٹیسٹ کی منفی رپورٹ پیش کرنا ہوگی۔‘‘ نیپال ، سری لنکا اور یوگنڈا سے تعلق رکھنے والے ٹرانزٹ مسافروں پر بھی یواے ای میں داخلے پر پابندی عاید کردی گئی تھی۔

Source: emirates.com