امریکی سفارتخانہ اسلام آباد کے نمائندوں نے پاکستان کے صحت حُکام کے ساتھ ایک مقامی ویکسین سنٹر کا دورہ کیا اور حال ہی میں امریکہ کی طرف سے عطیہ کیے گئےتیرہ لاکھ فائزر ٹیکوں میں سے کچھ کے استعمال کا براہ راست مشاہدہ کیا۔ اب تک امریکہ نے لگ بھگ ایک کروڑ اٹھاون لاکھ ویکسین ٹیکے پاکستان کو فراہم کیے ہیں۔

امریکی سفارت خانے کے مطابق امریکہ کے قائم مقام نائب سفیر رچرڈ سنیلسائر اور امریکی ادارہ برائے بین الاقوامی ترقی ( یو ایس ایڈ) کے قائم مقام ڈائریکٹر مائیکل نہرباس نے عوامی ٹیکہ مرکز میں موجود پاکستان کے حفظان صحت کے کارکنوں اور متعدد شہریوں سے گفتگو کرتے ہوئے ویکسین لگانے کے عمل کے بارے میں اُن کے تجربات اور ٹیکہ مہم کی اہمیت پر تبادلہ خیال کیا۔

امریکی سفارتخانہ کے قائم مقام نائب سربراہ رچرڈ اسنیلسائر کا کہناتھا کہ ریاست ہائے متحدہ امریکہ کی حکومت کرونا وائرس کے خلاف جنگ میں پاکستان کے لوگوں کا ساتھ دینے کا وعدہ نبھا رہی ہے۔

ان کا مزید کہنا تھا کہ امریکہ کے بہترین ادویات ساز مراکز سے براہ راست ترسیل کردہ یہ انجکشن لگوا کر معمولات زندگی بحال کرنے میں مدد ملے گی اور ہم اس وبا کو پیچھے چھوڑنے میں کامیاب ہو سکیں گے۔

انہوں نے کہا کہ امریکہ کو پاکستان کی حکومت اور حفظان صحت کارکنوں کے ساتھ شراکت پر فخر ہے ، جس کی وجہ سے یہ ٹیکے براہ راست پاکستان کے لوگوں تک پہنچ رہے ہیں۔تیرہ لاکھ سے زائد ویکسین کے حالیہ عطیات رواں موسم گرما میں امریکہ کی جانب سے خریدے جانے والے ان پچاس کروڑ فائزر خوراکوں کا حصہ ہیں جو پاکستان سمیت دنیا بھر کے ۹۲ ممالک کو فراہم کی جا رہی ہیں۔

ان کا مزید کہنا تھا کہ یہ صدر جو بائیڈن کی جانب سے دنیا بھر میں محفوظ اور موثر ویکسین کی فراہمی یقینی بنانے اور وبا کے خلاف بین الاقوامی جنگ میں مدد مہیا کرنے کے وعدہ کی تکمیل ہے۔