کراچی کے علاقے نارتھ ناظم آباد میں مسلح شخص نے فائرنگ کر کے نجی بینک کے مینجر کو قتل کردیا۔

نارتھ ناظم آباد بلاک آئی میں واقع نجی بینک کے باہر مسلح موٹرسائیکل سوار کی فائرنگ سے بینک مینجر جاں بحق ہوگیا۔

ایس ایس پی سینٹرل عثمان معروف کے مطابق واقعہ ذاتی دشمنی پر قتل کا ہے، مقتول برانچ مینجر ہے اور بینک کے دروازے پر سگریٹ پی رہا تھا کہ موٹرسائیکل پر سوار ملزم نے پہلے گیٹ پر موجود گارڈ کو اسلحے سے ڈرایا، اس دوران ملزم نے مینجر کا پیچھا کر کے اسے پیچھے سے تین گولیاں ماریں جس کے باعث وہ موقع پر ہی دم توڑ گیا۔

مقتول کی شناخت 70 سالہ مقبالی خان کے نام سے ہوئی ہے، مقتول کی لاش کو عباسی شہید اسپتال منتقل کیا گیا۔

پولیس نے جائے وقوعہ سے شواہد اکٹھے کر کے ملزم کی گرفتاری کیلئے تحقیقات شروع کردی ہیں۔