کراچی کے گبول ٹاؤن تھانے کے علاقے نارتھ کراچی سیکٹر 16 بی کی ندی میں تین سگے بھائیوں کو فائرنگ کرکے قتل کرنے کا واقعہ علاقے کے منشیات فروش گروہوں کے مابین تنازعے کا شاخسانہ قرار دیا گیا ہے۔

پولیس نے تہرے قتل کی واردات میں ملوث دو ملزمان کو حراست میں لے لیا ہے۔

پولیس ذرائع کے مطابق حراست میں لیے گئے دونوں ملزمان پیشہ ور منشیات فروش ہیں، مقتولین میں سے ایک بھائی اس علاقے میں مبینہ طور پر منشیات فروشی میں ملوث تھا۔

پولیس ذرائع کے مطابق کچھ دن قبل مقتول کا منشیات فروشوں کے ساتھ جھگڑا بھی ہوا تھا۔

تہرے قتل کی واردات کا مقدمہ مقتولین کے چچا علی محمد کی مدعیت میں نامعلوم ملزمان کے خلاف درج کرلیا گیا۔

درج ایف آئی آر میں مدعی مقدمہ کا کہنا تھا کہ میرے بھائی کے بیٹوں کا تین روز قبل چند لڑکوں سے جھگڑا ہوا تھا، ہمیں شبہ ہے کہ انہی لڑکوں نے میرے بھائی کے تینوں بیٹوں کو اسلحے سے فائرنگ کر کے قتل کیا۔

ایف آئی آر کے متن میں بتایا گیا کہ شدید فائرنگ کی آواز سن کر ہم موقع پر پہنچے تو ملزمان موقع پر سے فرار ہورہے تھے۔

مقتولین کی نماز جنازہ گزشتہ روز ادا کی گئی اور تدفین مہاجر کیمپ میں کی گئی۔

قتل کا واقعہ ہفتے کی شب نارتھ کراچی سیکٹرسولہ بی ندی میں پیش آیا تھا جہاں پانچ سے چھ ملزمان نے فائرنگ کر کے تین سگے بھائیوں سعد محمد ، خیال محمد اور نظر محمد کو قتل کردیا تھا۔