عالمی مارکیٹ میں سونے کی فی اونس قیمت میں 17 ڈالر کی کمی جب کہ پاکستان میں سونے کی فی تولہ قیمت میں صرف 100 روپے کم ہوئے۔

بین الاقوامی بلین مارکیٹ میں سونے کی فی اونس قیمت میں 17 ڈالر کی کمی ہوئی، اور عالمی مارکیٹ میں فی اونس سونے کی قیمت 1984 ڈالر کی سطح پر آگئی۔

دوسری جانب مقامی صرافہ مارکیٹ میں عالمی مارکیٹ کے حساب سے سونے کی قیمت میں کمی نہیں کی گئی اور جمعہ کے روز پاکستانی صرافہ مارکیٹوں میں بھی سونے فی تولہ اور دس گرام قیمت میں بالترتیب 100 روپے اور 86 روپے کی معمولی کمی ہوئی۔ تاہم ایک تولہ چاندی 30 روپے اضافے سے 2600 روپے کی نئی بلند سطح پر پہنچ گئی۔

آل سندھ صرافہ بازار ایسوسی ایشن کے مطابق جمعہ کے روز کراچی، حیدرآباد، ملتان، لاہور، راولپنڈی، اسلام آباد، پشاور، فیصل آباد اور کوئٹہ کی صرافہ مارکیٹوں میں سونے کی فی تولہ قیمت معمولی کمی کے بعد 2 لاکھ 18 ہزار 700 روپے اور دس گرام سونا 86 روپے کمی سے 1 لاکھ 87 ہزار 500 روپے کا ہوگیا۔