Aaj News

بدھ, جون 19, 2024  
12 Dhul-Hijjah 1445  

لاہور ہائیکورٹ نے عمران ریاض کی بازیابی کیلئے پولیس کو مزید مہلت دے دی

صحافی کی زندگی کے لیے دعا گو ہیں، لاہور ہائیکورٹ
شائع 14 جون 2023 06:55pm

لاہور ہائیکورٹ نے اینکر پرسن عمران ریاض کو بازیاب کرانے کے لیے پولیس کو مزید 10 روز کی مہلت دے دی۔ عدالت نے قرار دیا کہ صحافی کی زندگی کے لیے دعا گو ہیں۔

چیف جسٹس لاہور ہائیکورٹ جسٹس امیر بھٹی نے اینکر پرسن عمران ریاض کی بازیابی کے لیے ان کے والد ریاض خان کی درخواست پر سماعت کی۔ آئی جی پنجاب سمیت دیگر افسر عدالت کے روبرو پیش ہوئے۔

عمران ریاض کے وکیل میاں علی اشفاق نے بتایا کہ وہ ورکنگ کمیٹی کے سامنے پیش ہوئے تھے اور آئی جی پنجاب نے یقین دہانی کرائی کہ وہ کوششیں کررہے ہیں۔

چیف جسٹس لاہور ہائیکورٹ نے استفسار کیا کہ کیا وہ ورکنگ کمیٹی کی کاوش سے مطمئن ہیں۔

جس پر وکیل نے جواب میں کہا کہ عمران ریاض کی بازیابی درکار ہے، اس کے لیے آئی جی پنجاب سمیت ان کی ٹیم کام کررہی ہے، امید کرتے ہیں کہ پولیس جلد عمران ریاض کو بازیاب کرلے گی۔

چیف جسٹس لاہور ہائیکورٹ نے عمران ریاض کی بازیابی کے لیے پولیس کو مزید 10 روز کی مہلت دیتے ہوئے سماعت ملتوی کردی۔

Lahore High Court

Imran Riaz

justice ameer bhatti