نگران وزیر داخلہ سندھ بریگیڈئیر (ر) حارث نواز نے کراچی اور اندرون سندھ جلد بڑے آپریشن کا اعلان کردیا۔

مکلی بائی پاس پر میڈیا سے گفتگو میں حارث نواز کا کہنا تھا کہ کراچی اور اندرون سندھ میں بڑی کارروائیوں کی تیاری کر رہے ہیں، آج کل میں نئے افسران آجائیں گے جس کے بعد آپریشن ہوگا۔

انہوں نے کہا کہ ہم باکردار اور اچھے لوگوں کو لگا رہے ہیں جس کے بعد سندھ میں امن آجائےگا، کراچی سمیت سندھ بھر کو امن کا گہوارہ بنائیں گے اور کارروائیاں پورے صوبے میں ہوں گی۔ کچے اور پکے میں سب جگہ آپریشن ہوگا۔

نگران وزیرداخلہ سندھ کا کہنا تھا کہ گھوٹگی، کشمور، جیکب آباد اور کندھ کوٹ میں آپریشن کی تیاری مکمل کرلی ہے۔

ان کا کہنا تھا کہ ہم کسی کے خلاف سیاسی انتقامی کارروائی نہیں کر رہے ، صحافی جان محمد مہرکے قاتل ہمیں پتا ہے کہ کہاں ہیں، تبدیلیوں کے بعد آپ کو ایکشن نظر آئے گا۔

انہوں نے مزید کہا کہ صاف شفاف الیکشن کرائیں گے جیسے ہی تاریخ ملتی ہے، ہم ہدایات جاری کردیں گے، ہم پر کوئی سیاسی دباؤ نہیں نہ ہم لیں گے۔