بالی ووڈ اداکار جونیئر محمود سرطان جیسے موذی مرض سے جنگ لڑتے ہوئے انتقال کر گئے۔

بھارتی میڈیا کی جانب سے اداکار کی موت کی تصدیق کرتے ہوئے بتایا گیا ہے کہ اداکار سرطان کے مرض میں مبتلا تھے۔

بتایا جارہا ہے کہ اداکار سرطان کے مرض کی اسٹیج 4 تک پہنچ گئے تھے جس کا انکشاف 2 ہفتے پہلے ہی ہوا تھا۔

میڈیا رپورٹس کے مطابق گزشتہ رات ان کی طبعیت زیادہ بگڑی جس کے باعث وہ 67 سال کی عمر میں ممبئی میں اپنے گھر میں ہی انتقال کرگئے۔

علاج کے دوران اداکار محمود نے اپنے پرانے دوستوں، تجربہ کار اداکار جتیندر ، جانی لیور اور سچن پلگاؤ کر سے ملنے کی خواہش ظاہر کی تھی۔اس کے بعد سچن اور جتیندر جو نیئر محمود سے ملنے گئے تھے۔

جونیئر محمود نے اپنی اداکاری کا آغاز 1976 میں بطور چائلڈ آرٹسٹ سے کیا اور ان کی پہلی فلم ’نونہال‘ تھی، ان کا فلمی کیرئیر 5 دہائیوں پر مشتمل ہے اور انہوں نے 250 فلموں میں کام کیا ہے۔

انہوں نے ہاتھی میرے ساتھی ، کارواں اور میرا نام جو کر سمیت 7 مختلف زبانوں کی کئی مشہور فلموں میں کام کیا تھا۔