لاہور میں سسرالیوں نے مبینہ طور پر بہو کو بالائی منزل کی کھڑکی سے نیچے پھینک دیا، افسوس ناک واقعہ کی سی سی ٹی وی منظر عام پر آگئی۔

واقعہ گزشتہ رات گلشن راوی کے علاقے شالیمار روڈ پر پیش آیا، سی سی ٹی وی فوٹیج میں واقعہ کی آڈیو بھی ریکارڈ ہے۔

فوٹیج کی آڈیو میں متاثرہ خاتون مریم کے گھر سے کچھ خواتین کے چیخنے کی آوازیں آتی ہیں، اسی دوران مریم کو کھڑکی سے نیچے گلی میں گرتے دیکھا جا سکتا ہے۔

مریم کی چیخ و پکار پر اہل محلہ بھی موقع پر پہنچ جاتے ہیں، جو متاثرہ خاتون کو طبی امداد کیلئے اسپتال منتقل کرتے ہیں۔

دوسری جانب گلشن راوی پولیس نے متاثرہ خاتون کے بیان پر مقدمہ درج کر لیا، مقدمے میں خاتون کا شوہر شہزاد، دیور رومان اور ساس شازیہ نامزد ہیں۔

پولیس کا کہنا ہے کہ شبہ ہے کہ متاثرہ خاتون نے گھریلو ناچاقی پر خودکشی کی کوشش کی ہے، تاہم واقعہ کے حوالے سے مختلف پہلوؤں پر تحقیقات کی جارہی ہیں۔