پنجاب کی حکومت نے فیس بک پربچوں کے اغوا کی بڑھتی ہوئی وارداتوں کی نشاندہی کرنے پر ٹی وی اداکار حمزہ علی عباسی کوقانونی نوٹس بھجوایا ہے۔ 

بی بی سی اردو کے مطابق محکمہ قانون کی جانب سے بھیجے گئے اس نوٹس میں کہا گیا کہ حمزہ نے پنجاب بالخصوص لاہور سے اغوا ہونے والے بچوں کی تعداد کو نہ صرف بڑھا چڑھا کر پیش کیا بلکہ اس بات کا بھی ذکر نہیں کیا کہ کتنے بچے بازیاب ہو چکے ہیں۔

نوٹس میں مزید کہا گیا کہ حمزہ نے بچوں کی گمشدگی سے متعلق غلط بیانی سے کام لیا جس کی وجہ سے لوگوں میں عدم تحفظ کا احساس پیدا ہوا۔

اطلاعات کے مطابق حمزہ کے فیس بک پیج پر فالوورز کی تعداد 30 لاکھ سے زیادہ ہے۔

نوٹس میں یہ بھی کہا گیا ہے کہ اگر انہوں نے اس معاملے پر پنجاب حکومت سے معافی نہ مانگی تو ان کے خلاف حکومت کی شہرت کو نقصان پہنچانے کے حوالے سے سائبر کرائم کے تحت قانونی کارروائی عمل میں لائی جائے گی جس میں کسی کی شہرت کو نقصان پہنچانے کی سزا تین سال ہے۔

حمزہ علی عباسی نے پنجاب حکومت کی جانب سے ملنے والے نوٹس کی تصدیق کرتے ہوئے واضح کیا کہ انہوں نے بچوں کے اغوا ہونے کی معلومات مختلف اخبارات میں چھپنے والی خبروں سے حاصل کی ہیں۔

بشکریہ: بی بی سی اردو