قربانی کا گوشت کچھ لوگوں کے گھروں میں کئی مہینوں تک استعمال ہوتا ہے۔ البتہ ہر گھر میں ہی قربانی کا گوشت روازنہ کے حساب سے بنتا ہے۔

 قربانی کے گوشت کو اگر صحیح طریقے سے استعمال کیا جائے تو اس کا کوئی نقصان نہیں ہوتا لیکن اگر گوشت صحیح طریقے سے صاف اور محفوظ نہیں کیا جائے تو اس سے کئی پیٹ کی بیماریاں لاحق ہوسکتی ہیں۔

قربانی کا گوشت استعمال کرتے ہوئے اگر آپ درج ذیل بیان کی گئی 6 باتوں کو ذہن میں رکھیں تو آپ کئی طرح کی بیماریوں سے محفوظ رہ سکتے ہیں۔

٭ کم گوشت کھائیں

کوشش کریں کہ گوشت کا استعمال کم سے کم کیا جائے کیونکہ گوشت 72 گھنٹوں بعد ہضم ہوتا ہے، اگر آپ 72 گھنٹوں کے دوران صرف گوشت کا ہی استعمال کریں گے تو اس سے آپ کا نظام ہاضمہ شدید متاثر ہوگا۔

٭ چہل قدمی ضرور کریں

چہل قدمی آپ کے صحت کیلئے بے حد فائدہ مند ہے۔ اگر آپ چہل قدمی نہیں کرتے ہیں تو عید الاضحیٰ کے دوران چہل قدمی کو اپنا معمول بنالیں کیونکہ اس سے آپ کا نظام ہاضمہ بہتر ہوگا اور آپ کا معدہ بھی ٹھیک کام کرے گا۔ صبح کے وقت یا پھر رات کو کھانے کے بعد چہل قدمی ضرور کریں۔

٭ پھل اور سبزیاں بھی کھائیں

اپنے کھانوں میں صرف گوشت ہی شامل نہیں کریں بلکہ پھل اور سبزیوں کو بھی اپنےروٹین میں شامل کریں۔اس سے آپ کی صحت اچھی اور توانا رہے گی۔

٭ کولڈ ڈرنکس بالکل نہیں پئیں

اکثر لوگ عیدالاضحیٰ کے موقع پر ہر قسم کے کھانے پینے کا استعمال کرنے لگتے ہیں بغیر یہ سوچے سمجھے کہ اس سے ہماری صحت پر کیا اثرات مرتب ہونگے۔ کوشش کریں کہ گوشت کے ساتھ کولڈ ڈرنکس کا استعمال کم کیا جائے یا پھربالکل نہیں کیا جائے۔

٭ گرین ٹی پئیں

اپنی روزمرہ کی غذاؤں میں گرین ٹی کا استعمال ضرور کریں۔ کوشش کریں کہ 2 وقت گرین ٹی پئیں، اگر دو ٹائم نہیں تو ایک ٹائم گرین ٹی ضرور پئیں، اس سے آپ کے معدے کو تقویت ملے گی۔

٭ مرچیں کم کھائیں

جب بھی کھانا بنائیں تو اس میں مرچوں کا استعمال کم سے کم کریں۔ کوشش کریں کہ ہلکے مصالحوں کا سالن تیار کیا جائے۔

نوٹ: یہ مضمون محض عام معلومات کےلیے ہے، اس پر عمل کرنے سے قبل اپنے معالج سے ضرور مشورہ کرلیں۔