جب آپ کسی کے گھر جاتے ہیں تو آپ کے آداب اور مزاج لوگوں پر گہرا اثر ڈالتے ہیں۔ اگر آپ کسی کے مہمان بنے ہیں تو میزبان کے گھر جاکر چند باتوں کا خیال کریں۔

درج ذیل چند باتوں کا ذکر کیا جارہا ہے۔ جب بھی آپ کسی کے گھر مہمان بنیں تو ان باتوں کا خاص خیال رکھیں۔

٭ اپنی آمد کیلئے پہلے مطلع کردیں

جب بھی کسی کے گھر جانے کا ارادہ کریں تو پہلے اس شخص کو اپنی آمد کے لئے مطلع کردیں اور میزبان کو اس بات کی بھی وضاحت کردیں کہ آپ کتنے لوگوں کے ہمراہ ان کے گھر جائیں ۔ لیکن سب سے پہلے یہ پوچھ لیں کہ میزبان کون سے دن فارغ ہیں تاکہ پھر آپ اسی حساب سے ان کے گھر جائیں۔

٭ تحفے لے کر جائیں

جب بھی کسی کے گھر جائیں تو آپ تحفے ضرور لے کر جائیں ضروری نہیں ہے کہ آپ بہت مہنگے تحفے خریدیں بلکہ آپ کھانے کی کوئی چیز بھی تحفے کے طور پر لے کر جاسکتے ہیں، جیسے پھل، بسکٹس اور چپس وغیرہ۔

٭گھر کے آداب ضرور پوچھ لیں

جب بھی آپ کسی کے مہمان بن کر جائیں تو میزبان سے ان کے گھر کے آداب کے حوالے سے ضرور پوچھ لیں۔ ایسا نہ ہو کہ آپ کے کسی عمل سے ان کو کچھ برا لگ جائے اور ایک اچھا ماحول خراب ہوجائے۔

٭ زیادہ کپڑے لانڈری نہ کریں

اگر آپ کسی کے گھر تھوڑے دن قیام کرنے کی غرض سے جارہے ہیں تو اس بات کا ضرور خیال رکھیں کہ آپ اپنے میزبان کوزیادہ کپڑے لانڈری کرنے کے لئے نہیں دیں یا کوئی بھی ایسا کام کرنے سے گریز کیا جائے جس سے آپ کے میزبان کو تکلیف ہو۔

٭ ہر کام میں مدد کریں

اپنے میزبان کے ساتھ ہر کام میں ہاتھ ضرور بٹائیں۔ اگر کھانا پک رہا ہے تو آپ بھی ان کے ساتھ کھانا بنوائیں۔ جب کھانا کھا چکے تو ان کے ساتھ مل کر کچن صاف کروائیں۔

٭ اپنا ٹوتھ پیسٹ لےکر جائیں

جب بھی کسی کے گھر رہنے جائیں تو اپنا صابن، ٹوتھ پیسٹ اور شیمپو ساتھ لے کر جائیں۔

٭ چھوٹی باتوں کا خیال کریں

جب آپ کسی کے گھر رہنے جائیں تو چھوٹی چھوٹی باتوں کا خیال ضرور رکھیں۔ جیسے جب بھی کمرے سے باہر آئیں تو لائٹ بند کرکے آئیں، کچن میں کیبنٹ سے کچھ نکالیں تو اس کا دروازہ اچھی طرح بند کریں، کچن میں کچھ کھایا ہے تو برتنوں کو دھوکر رکھیں۔

٭کمرے کو صاف رکھیں

جب آپ کسی کے گھر رہنے جاتے ہیں تو وہ آپ کےلئے کمرے کو اچھے طریقے سے تیار کرتے ہیں۔ لہذا آپ بھی ان کی چیزوں کا خیال کریں اور ان کے دیئے ہوئے کمرے کو صاف کرکے رکھیں۔کپڑوں کو یاتو سوٹ کیس میں رکھیں یا پھر الماری میں رکھیں۔

٭ گھر کو صاف کرکے جائیں

جب بھی میزبان کے گھر سے واپس جانے لگیں تو جتنا ممکن ہوسکتا ہے گھر کو صاف کردیں۔ بستر کی چادر کو ٹھیک کرکے جائیں، باتھ روم میں کو بھی اچھی طرح صاف کریں اور ہر چیز کو اس کی جگہ پر رکھ کر جائیں۔