بھارتی فلموں کی مقبولیت کا دارومدار کہانی،موسیقی اور رقص کے علاوہ  مرکزی کرداروں پر بھی ہوتا ہے۔جب سے  بھارتی فلم انڈسٹری  کا قیام عمل میں آیا ہے لوگ اچھے گانوں کے علاوہ  ہیرو اور ہیروئنز کو بھی اہمیت دیتے ہیں۔

بولی وڈ میں کئی جوڑیاں بے انتہا مقبولیت حاصل کرنے میں کامیاب رہی ہیں۔جن میں نمبر ون شاہ رخ کاجول کی جوڑی ہے،شاہ رخ کاجول نے ایک ساتھ کئی فلموں میں کام کیا ہے اور ان کی ساری فلمیں لوگوں کی توجہ کا مرکز رہی ہیں ،اسی طرح اور بہت سی جوڑیاں ہیں جنہیں لوگ ایک ساتھ دیکھنا چاہتے ہیں۔

یہ جوڑیاں اپنے چاہنے والوں پر جادو کردیتی ہیں  لہٰذا ہدایت کار اور پروڈیوسر ز بھی اس سے فائدہ اٹھاتے ہوئے اپنی فلموں میں مشہور جوڑیوں کو ہی کاسٹ کرتے ہیں تاکہ ان کی فلمیں کامیابی سے ہمکنار ہوں۔

آئیے دیکھتے ہیں بولی وڈ کی مشہور آن اسکرین جوڑیاں

شاہ رخ خان، کاجول

شاہ رخ کاجول بولی وڈ کی سب سے مقبول جوڑی ہے دونوں نے ایک ساتھ کئی فلموں میں کام کیا ہے جن میں بازیگر،دل والے دلہنیا لے جائیں گے،کبھی خوشی کبھی غم ،مائی نیم از خان اور کچھ کچھ ہوتاہے وغیرہ شامل ہیں ،بولی وڈ کے تقریباً تمام ہدایت کار اور پروڈیوسرز انہیں اپنی فلم میں کاسٹ کرنا چاہتے ہیں کیونکہ انہیں معلوم ہے فلم میں ان کی موجودگی  لوگوں کو اپنی  طرف کھینچنے میں کامیاب ہوجائے گی۔

شاہدکپور،کرینہ کپور

بولی وڈ کے دو بہترین اداکار(کرینہ ،شاہد کپور) نے ایک ساتھ کئی فلموں میں کام کیا ہے جن میں چپ چپ کے،ملیں گے ملیں گے،اڑتا پنجاب اور فدا وغیرہ شامل ہیں لیکن فلم جب وی میٹ  میں دونوں کی جوڑی کو بیحد پسند کیا گیا تھا۔

سلمان خان،مادھوری ڈکشٹ

بولی وڈ کے سلطان سلمان خان اور خوبصورت اداکارہ مادھوری ڈکشٹ کو فلم ہم آپ کے ہیں کون میں بیحد پسند کیا گیا تھا لوگ انہیں  دوبارہ ایک ساتھ دیکھنے کیلئے بے تاب ہیں ،دونوں  نے فلم دل تیرا عاشق،ہم تمہارے ہیں صنم  اور ساجن میں بھی ایک ساتھ اداکاری کے جوہر دکھائے ہیں۔

رنبیر کپور،دیپیکا پڈوکون

رنبیر کپور اوردیپیکا پڈوکون حالیہ دور  کی بہترین جوڑی قرار دی جاتی ہے،دونوں کے اصل زندگی میں تعلقات چاہے اچھے نہ ہوں لیکن اسکرین پر دونوں بہترین پرفارمنس دیتے ہیں رنبیر، دیپیکا نے ایک ساتھ یہ جوانی ہے دیوانی،بچنا اے حسینو اور فلم تماشہ میں کام کیا ہے۔

عامر خان،جوہی چاؤلہ

بولی وڈ کے مسٹر پرفیکٹ عامر خان اور ماضی کی معروف اداکارہ جوہی چاؤلہ کی جوڑی کو ہمیشہ پسند کیا جاتا ہے،دونوں نے ایک ساتھ پہلی بار فلم قیامت سے قیامت تک میں کام کیا تھا جس میں ان کی اداکاری کو بہت پسند کیا گیا ،اس کے علاوہ انہوں نےفلم عشق،ہم ہیں راہی پیار کے اور تم میرے ہو میں کام کیا ہے۔

ورون دھون ،عالیہ بھٹ

ورون دھون اور عالیہ بھٹ نے ایک ساتھ کرن جوہر کی فلم اسٹوڈنٹ آف دی ائیر  سے کیرئیر کا آغاز کیا تھا جس میں دونوں کی جوڑی کو بیحد پسند کیا گیا تھا ،اس کے علاوہ دونوں نے ہمپٹی شرما کی دلہنیا میں بھی  کام کیا ہے،بہت جلد دونوں ایک ساتھ فلم بدری ناتھ کی دلہنیا میں نظر آئیں گے۔

ارجن کپور،پرینیتی چوپڑا

ارجن کپور اور پرینیتی چوپڑا  نے صرف ایک ہی فلم عشق زادے میں کام کیا ہے،یہ دونوں کی پہلی فلم تھی ،دونوں کی جوڑی  بے انتہا مقبولیت سمیٹنے میں کامیاب ہوگئی تھی۔

ہرتیک روشن،ایشوریا رائے

ہرتیک روشن اور ایشوریا رائے نے ایک ساتھ 3 فلموں میں کام کیا ہے اور تینوں ہی باکس آفس پر بے انتہا کامیاب رہیں ،ان کی فلموں کے نام  بالترتیب دھوم ٹو،جودھا اکبر اور گزارش ہیں ،یہ جوڑی لوگوں کی توجہ اپنی جانب مبذول کروانے میں کامیاب رہی ہے۔

جان ابراہیم،بپاشا باسو

جان ابراہیم اور بپاشا باسو نے ایک ساتھ اتنی فلمیں نہیں کیں جتنی  شہرت حاصل کی ہے،دونوں کے بارے میں یہاں تک افواہیں گردش کرنے لگی تھیں کہ بہت جلد دونوں اداکار شادی کے بندھن میں بندھ  جائیں گےلیکن ہوا اس کے برعکس،تاہم دونوں ایک ساتھ فلم جسم،اعتباراور مدہوشی میں نظر آئے ۔

امیتابھ بچن،ریکھا

بھارتی فلم انڈسٹری کے بگ بی امیتابھ بچن اور ریکھا  کا شمار بولی وڈ کی مشہور جوڑیوں میں ہوتا ہے دونوں نے ایک ساتھ بہت سی فلموں میں کام کیا ہے جن میں مسٹر نٹورلال،دو انجانے،نمک حرام،سلسلہ وغیرہ شامل ہیں۔