راولپنڈی :شمالی وزیرستان میں سیکیورٹی فورسز سے جھڑپ کے دوران 7دہشت گرد ہلاک ہوگئے جبکہ فائرنگ کے تبادلے میں پاک فوج کے 2جوان بھی جام شہادت نوش کرگئے ۔

پاک فوج کے شعبہ تعلقا ت عامہ (آئی ایس پی آر)کے مطابق سیکیورٹی فورسز اور دہشت گردوں کے درمیان شمالی وزیرستان کے علاقے غلام خان کلی میں جھڑپ ہوئی اور سیکیورٹی فورسز نے مؤثر طریقے سے دہشت گردوں کا مقابلہ کیا۔

سیکیورٹی فورسز کی جوابی کارروائی میں 7دہشت گرد مارے گئے جبکہ ہلاک دہشت گردوں سے ہتھیاراور اسلحہ بھی برآمد ہوا۔

آئی ایس پی آر کا کہنا ہے کہ مارے گئے دہشت گرد سیکیورٹی فورسز کیخلاف مختلف دہشت گردی کی کارروائیوں میں ملوث تھے۔

ترجمان پاک فوج کے مطابق شدید فائرنگ کے تبادلے میں بہادری سے لڑتے ہوئے 2 سیکیورٹی اہلکار شہید ہوگئے، جن میں 44 سالہ شہید صوبیدار منیر حسین کا تعلق پاراچنار کرم جبکہ 38 سالہ حوالدار بابو خان کا تعلق ڈیرہ اسماعیل خان سے تھا ۔

آئی ایس پی آر کے جاری کردہ بیان کے مطابق علاقے میں مزید دہشت گردوں کی تلاش کیلئے کلیرنس آپریشن جاری ہے ۔