Aaj Logo

شائع 16 جولائ 2022 07:35pm

ٹریفک قوانین کے نفاذ کے لیے دہلی پولیس کا کرینہ کپور کے ‘پوُ’ کے کردار کا استعمال

بالی ووڈ کی فلم ‘کبھی خوشی کبھی غم’ کے کچھ کردار اور ڈائیلاگ کافی مقبول ہوئے تھے اور آج دن تک مداحوں کو یاد ہیں۔ اس بات کا تخلیقی اور مزاحیہ انداز میں استعمال کرتے ہوئے انڈیا میں دہلی پولیس نے ٹریفک قوانین پر زور دیا ہے۔

فلم میں کرینہ کپور کے کردار کا نام ‘پوجا’ یا ‘پوُ’ تھا اور ان کا ایک ڈائیلاگ بہت مقبول ہوا تھا: ‘کون ہے وہ جس نے دوبارہ مُڑ کے مجھے نہیں دیکھا’۔

دہلی پولیس نے اپنے ٹوئٹر پر ایک ویڈیو شیئر کی ہے جس میں ایک گاڑی کو سگنل کی بتی لال ہونے کے باوجود گزرتا ہوا دیکھا جاسکتا ہے۔ اس پر ویڈیو میں سگنل کی لال بتی پر ‘پوُ’ کا چہرہ ہے، جو مذکورہ ڈائیلاگ کہہ رہی ہے۔

اس ویڈیو کے ساتھ ہی دہلی پولیس نے لکھا ہے کہ ‘یہ کون ٹریفک کی خلاف ورزی کرنے والا ہے؟ پوُ کو توجہ پسند ہے اور ٹریفک لائیٹس کو بھی’۔

تاہم یہ پہلی بار نہیں ہوا ہے کہ دہلی پولیس نے کوئی پیغام پہنچانے کے لیے میمز کا استعمال کیا ہو۔

حال ہی میں جب ناسا (نیشنل ایئروناٹکس اینڈ سپیس ایڈمنسٹریشن) نے کائنات کی اب تک کی صاف ترین تصویر رلیز کی تو دہلی پولیس نے اس کو بھی ٹریفک قوانین نافذ کرنے کے لیے استعمال کیا۔

پولیس نے ایک ٹویٹ میں ناسا کی رلیز کی گئی کائنات کی تصویر کے ساتھ ایک شخص کی سیٹ بیلٹ لگاتے ہوئے تصویر لگائی اور لکھا کہ “یہ ایک ذمہ دار شہری کی صاف ترین تصویر ہے”۔

اس کولاج کے ساتھ کیپشن تھا کہ ّتارے اور چالان دیکھنے سے بچنے کے لیے سیٹ بیلٹ لگا کر گاڑی چلائیں۔

Read Comments