کسی دن آپ اپنی گاڑی کا بونٹ کھولیں اور آپ کو ایک بن بلایا مہمان بڑے ہی پُرسکون اندازمیں بیٹھا دکھائی دے تو آپ کا ردعمل کیا ہوگا؟ جواب سے پہلے یہ جان لیں یہ مہمان کوئی اورنہیں ایک خطرناک سانپ ہے۔
ایک امریکی شہری نے گاڑی کا بونٹ اٹھایا، تو اسے دیکھ کر جھٹکا لگا کہ انجن کے عین اوپرایک خوفناک سانپ بڑے سکون سے براجمان ہے۔
واقعے کی ویڈیو سوشل میڈیا پر وائرل ہے۔ گاڑی کے مالک نے بتایا کہ انجن کے گرد موجود سات فٹ لمبا سانپ مسلسل حرکت کررہا تھاجسے ہٹانے کے لیے پولیس کو کال کی۔
میڈیا رپورٹ کے مطابق واقعہ امریکی ریاست وسکونسن کے شہرگرین بے میں پیش آیا۔ دیوہیکل سانپ جنگل کارپٹ پائتھن ہے، خیال کیا جارہا ہے کہ یہ آسٹریلیا سے آیا اورکسی طرح امریکا پہنچا۔
بیچ وائلڈ لائف سینکوریری میں جانوروں کی کیوریٹر لوری بینکسن کے مطابق ممکن ہے کہ سانپ گرم رہنے کے لیے کار کے انجن میں گھسا ہو گا جہاں اسے تھوڑی دیرکیلئے اچھی جگہ مل گئی۔
گرین بے پولیس ڈیپارٹمنٹ کے افسران بھی سانپ کو ہٹانے میں ناکام رہے جس کے بعد کار کے مالک کو سانپ کے ساتھ قریبی وائلڈ لائف پرزرو کی طرف بھیجا گیا۔حکام نے واضح کیا کہ گاڑی کا مالک سانپ کا مالک نہیں تھا۔
