مسجد الحرام میں تیز بارش میں بھی بیت اللہ شریف کا غلاف تبدیل کردیا گیا ، غلاف کعبہ کی تبدیلی کے دوران قدرت بھی مہربان رہی باران رحمت برسنے سے مناظر اور بھی روح پرور ہوگئے۔

مکہ مکرمہ میں خانہ کعبہ کو غسل دينے اور تبدیلی غلافِ کعبہ کی پروقار تقریب ہوئی،جہاں 160ماہرین نے شرکت کی۔

خانہ کعبہ کو غسل دينے کے بعد خالص سونے، چاندی کی تاروں اور خالص ریشم سے تیار کردہ غلاف کعبہ تبدیل کیا گیا،غلاف کعبہ کی تیاری میں 670کلوخالص ریشم ،120کلوسنہری اور100 کلو چاندی کا دھاگا استعمال کیا گیا۔

غلاف کعبہ کی لمبائی 50 فٹ اور چوڑائی 35 سے 40 فٹ ہے،اس کی تیاری پر 24 ملین سعودی رالچ لاگت آئی۔

غلاف کعبہ کے 4 کونوں پر سورہ اخلاص منقش ہے، اس کے علاوہ غلاف پر مختلف آیات قرآنی پر مشتمل 16 پٹیاں الگ سے جوڑی گئی ہیں جن پر آیات ربانی کو سونے، چاندی اور خالص ریشم سے تحریر کیا گیا ہے۔