لاہور:وزیراعلیٰ پنجاب عثمان بزدار نے بارش کے باعث نشیبی علاقے زیر آب آنے کا نوٹس لیتے ہوئے واسا حکام اور انتظامیہ کو نکاسی آب کا حکم دے دیا۔

وزیراعلیٰ پنجاب عثمان بزدار نے نشیبی علاقوں میں جمع ہونے والے بارش کے پانی کی جلد نکاسی کا حکم دیتے ہوئے کہا ہے کہ ضروری مشینری کے ذریعے نشیبی علاقوں سے نکاسی آب کا کام فی الفور مکمل کیا جائے۔

عثمان بزدار نے کہا کہ واسا حکام اور انتظامیہ نکاسی آب کے لیے تمام وسائل بروئے کار لائے،پانی کی نکاسی کے کام میں تساہل ہرگز برداشت نہیں۔

وزیراعلیٰ پنجاب نے حکم دیا کہ نکاسی آب کی نگرانی کیلئے واسا اور انتظامی افسران خود فیلڈ میں موجود رہیں اور جتنی جلد ہوسکے نشیبی علاقوں میں جمع ہونے والا بارش کا پانی نکالا جائے۔