سیکریٹری بلدیات کے منظور نظر افسرمشیر مالیات کے عہدے پر تعینات
کراچی میونسپل کارپوریشن کی خراب کارکردگی کے باعث شہر کا برا حال ہے لیکن کے ایم سی افسران کی من مانیاں اب بھی جاری ہیں۔پابندی کے باوجود سیکریٹری بلدیات کے منظور نظر افسر کو مشیر مالیات کے عہدے سے نواز دیا گیا ہے۔
سندھ لوکل گورنمنٹ بورڈنےبلدیہ اعظمی کراچی سمیت صوبہ بھر کے منتخب نمائندوں کی مدت 28 اگست کو ختم ہونے سے قبل ہی گزشتہ ماہ افسران کے تبادلوں اور تقریروں پر پابندی عائد کردی تھی۔
تاہم کے ایم سی کے ڈائریکٹر ہیومن ریسورس نے ڈائریکٹر انٹرل آڈٹ آفاق سعید کو مشیر مالیات کے عہدے سے بھی نواز دیا ہے۔آفاق سعید کو مشیر مالیت کے عہدے کا اضافی چارج دینے کےلئے اس عہدے پر تعینات گریڈ 19 کے افسر ریاض احمد کھتری کو عہدے سے ہٹادیا گیا۔
ذرائع کے مطابق آفاق سعید گریڈ 17 کے افسر ہیں مگر کیونکہ سیکریٹری بلدیات کے منظور نظر ہیں، سیکریٹری بلدیات نےہی آفاق سعید کو دو ماہ قبل ڈی ایم سی ایسٹ سے بلدیہ اعظمی کراچی منتقل کیا تھا اور ان ہی کی سفارش پر آفاق سعید کو مشیر مالیات مقرر کیا گیا ہے۔
اس حوالے سے سندھ لوکل گورنمنٹ بورڈ حکام سے رابطہ کرنے پر انہوں نے آفاق سعید کی ڈی ایم سی سے کے ایم سی میں منتقل اور پھر مشیر مالیات تعینات کئے جانے کو مکمل طور پر غیر قانونی قرار دیا ہے کیونکہ دونوں حکم ناموں میں نہ تو آفاق سعید کا گریڈ لکھا گیا ہے اور نہ ہی یہ بتایا گیا ہے کہ وہ کس گروپ کے افسر ہیں۔
آفاق سعید سیکریٹری مائنز اینڈ منرلز دانش سعید کے بھائی ہیں۔
Comments are closed on this story.