پاکستان کو کورونا وائرس کی وبا کے باعث صحت سے متعلق سماجی و اقتصادی چیلنجوں سے نمٹنے کےلئے قرضوں اور امداد کی مد میں تین ارب 55 کروڑ 20 لاکھ ڈالرز سے زائد غیر ملکی امداد موصول ہوئی ہے۔

یہ بات وفاقی وزیرِاقتصادی امورخسرو بختیار نے آج قومی اسمبلی کے وقفہ سوالات کے دوران ایک تحریری جواب میں بتائی۔

وفاقی وزیر نے بتایا کہ جی 20ممالک نے قرضوں کی موخر ادائیگی کے ذریعے دوارب 12 کروڑ روپے سے زائد کی سہولت فراہم کی۔

انہوں نے کہا کہ غیر ملکی اقتصادی تعاون سے حکومت کو مالیاتی سہولت ملی جس کے نتیجے میں لوگوں کی زندگیاں اور روزگار کو محفوظ بنانے اور کورونا وائرس سے پیداہونےوالے معاشی اثرات کو کم کرنے کےلئے مالیاتی وسائل کو بروئے کار لایا گیا۔

ایوان کااجلاس اب غیر معینہ مدت کےلئے ملتوی کردیاگیا۔

ریڈیو پاکستان