وفاقی وزیراطلاعات شبلی فراز نے کہا ہے کہ مریم نواز اور کیپٹن صفدر نے مزار قائد پر ہلڑ بازی کی، مزار قائد کو سیاسی اکھاڑا بنانے کی اجازت نہیں دی جاسکتی، یہ بھول جائیں کس نے گرفتار کیا، آپ جرم دیکھیں۔

شبلی فراز نے کہا کہ انھوں نے قائداعظم کے مزار کی حرمت کو ٹھیس پہنچائی، یہ اپنی کرپشن بچانے کیلئے شور مچارہے ہیں، ان کے جھوٹ کو جواب ہم ضرور دیں گے۔

وزیر اطلاعات پنجاب فیاض الحسن چوہان نے مزارِ قائد کی بے حرمتی پر مریم نواز کی بھی گرفتاری کا مطالبہ کردیا۔

انہوں نے کہا کہ مزار قائد کی بے حرمتی کا انجام صفدر اعوان کی گرفتاری ہی تھا، اس تمام ہلڑ بازی کے پیچھے بیگم صفدر کی پلاننگ تھی۔ بیگم صفدر کو بھی مزار کی بے توقیری پر گرفتار کیا جائے، انھیں بھی معافی مانگنی چاہئے تھی۔

وفاقی وزیرعلی زیدی نے کیپٹن صفدر کی گرفتاری پر ردعمل دیتے ہوئے کہا کہ کیپٹن صفدر ایک چھوٹا سا مہرہ ہیں، کیس کے اصل کرداروں کو گرفتار کیا جانا چاہئے۔

انہوں نے کہا کہ مریم نواز، نہال ہاشمی، محمد زبیر بھی اس وقت موجود تھے، انھیں بھی پکڑیں اور مثال بنائیں۔ محض مہروں کی گرفتاری سے خانہ پوری ہرگز قبول نہیں۔ قوم اصل کرداروں کی گرفت کی منتظر ہے۔