رجسٹرار آفس لاہور ہائیکورٹ نے شہباز شریف کی جانب سے توہین عدالت کی درخواست اعتراض لگا کر واپس کردی گئی جبکہ عدالتی حکم پر عمل درآمد کروانے کی متفرق درخواست کل سماعت کیلئے مقرر کر دی گئی۔

اپوزیشن لیڈر قومی اسمبلی شہباز شریف کی جانب سے دائر کی گئی توہین عدالت کی درخواست میں وفاقی حکومت، ڈی جی ایف آئی اے واجد ضیا سمیت دیگر کو فریق بنایا گیا ہے۔

درخواست میں مؤقف اختیار کیا گیا ہے کہ لاہور ہائیکورٹ نے شہباز شریف کو علاج کیلئے بیرون جانے کی اجازت دی،

عدالتی حکم کے باوجود شہباز شریف کو بیرون ملک جانے سے روکا گیا، عدالتی احکامات پر عمل درآمد نہ کرنے پر متعلقہ افسران کے خلاف توہین عدالت کی کارروائی کی جائے۔

رجسٹرار آفس نے درخواست اعتراض لگا کر واپس کرتے ہوئے بتایا کہ کورونا کے باعث کوئی نئی درخواست وصول نہیں کی جا رہی، جس کا نوٹیفکیشن جاری کیا جا چکا ہے۔

تاہم رجسٹرار آفس نے شہباز شریف کی جانب سے عدالتی احکامات پر عمل درآمد کروانے کی متفرق درخواست کو کل سماعت کیلئے مقرر کر دیا ہے۔

متفرق درخواست میں موقف اختیار کیا گیا ہے کہ عدالتی احکامات کےباوجود ایف آئی اے حکام شہباز شریف کو باہر جانے سے روکنے کیلئے عذر تلاش کرتے رہے، عدالت سات مئی کو جاری کئے گئے فیصلے پر عملدرآمد کے احکامات جاری کرے۔