لندن:انگلینڈ کرکٹ ٹیم کے آل راؤنڈر بین اسٹوکس کو ایشز سیریز سے قبل گزشتہ اتوار خطرناک تجربے کا سامنا کرنا پڑا۔

بین اسٹوکس نے برطانوی اخبار میں کالم لکھتے ہوئے بتایا کہ گزشتہ اتوارانہوں نے اپنے کمرے میں ایک معمولی سی ٹیبلٹ (گولی) کھائی جو ان کی سانس کی نالی میں پھنس گئی۔

بین اسٹوکس نے لکھا کہ گولی پھنسنے کی وجہ سے سانس لینے میں کافی مشکل ہوئی اور وہ جب تک وہ باہر نہیں نکلی مجھے ایک وقت پر تو ایسا لگا کہ میں زندہ نہیں بچوں گا۔

انگلش کرکٹر نےمزید لکھا کہ اکثر آپ کے گلے میں کچھ پھنس جائے تو کوئی نہ کوئی آپ کی مدد کیلئے موجود ہوتا ہے مگر میں اپنے کمرے میں اکیلا تھا۔

اس کے علاوہ بین اسٹوکس کی مشکلات یہاں ختم نہیں ہوئیں بلکہ جب وہ اس سب ڈرامے کے بعد پریکٹس کرنے گئے تو ان کے بازو پر گیند لگ گئی۔

بین اسٹوکس نے بتایا کہ پریکٹس کے دوران بیٹنگ کوچ ٹروٹ کی گیند بازو پر لگی جس کے بعد وہ کافی اذیت میں رہے اور انہیں ایسا لگا کہ ان کا بازو ٹوٹ گیا ہے۔

واضح رہے کہ بین اسٹوکس 5 دسمبر سے انگلینڈ اور آسٹریلیا کے درمیان ایشز سیریز کیلئے قومی اسکواڈ کا حصہ ہیں۔